2023-cü il iyulun 10-14-də Türkiyənin Gazi Universitetinin Təhsil fakültəsinin və Beynəlxalq əlaqələr şöbəsinin əməkdaşı Aslıhan Selcen Bingöl Erasmus+ İşçi Heyətinin Mübadilə Proqramı (Erasmus+ KA107171) çərçivəsində Xəzər Universitetinin Humanitar, təhsil və sosial elmlər fakültəsi və Beynəlxalq əlaqələr ofisi tərəfindən qəbul edildi.
Proqramın ilk günü Humanitar, təhsil və sosial elmlər fakültəsinin dekan müavinləri Aygün Verdiyeva, Tərlan Orucova və Beynəlxalq əlaqələr ofisinin koordinatoru Fatimə Vəliyevanın türkiyəli qonaqla tanışlıq görüşü keçirildi. Görüşdə dekan müavinləri fakültənin fəaliyyəti və istiqamətləri haqqında məlumat verdilər və fakültələrarası növbəti əməkdaşlıqlar istiqamətində müzakirələr aparıldı.
Proqrama uyğun olaraq Kitabxana İnformasiya Mərkəzinin direktor müavini Aytac Misgərli qonağı mərkəzin fəaliyyəti ilə tanış etdi. Nailəxanım Mədəniyyət Mərkəzində ona görkəmli pedaqoq Nailəxanım İsayevanın həyat və fəaliyyətini əks etdirən eksponatlar haqqında məlumat verildi. Qonaq İctimai əlaqələr və media üzrə direktor Əlövsət Əmirbəyli ilə də görüşdü.
Proqramın növbəti günündə qonaq Xəzər Universitetinin əməkdaşları və tələbələrinə “İnklüziv təhsil və rəqəmsallaşma“ mövzusunda vörkşop keçdi.
Sonra qonaq Fatimə Vəliyeva ilə Şəhidlər Xiyabanı, Bakı Türk şəhidliyi, Qız Qalası, Dağüstü Park, Bakı funikulyoru, Alov qüllələri, Bakı bulvarı və İçərişəhərdə oldular.
Proqramın sonunda Aslıhan Selcen Bingöllə sertifikat və hədiyyə təqdim edildi.