2023-cü il iyulun 7-də Xəzər Universiteti Elmi Şurasının növbəti iclası keçirildi. İclası universitetin rektoru Dos. İradə Xəlilova açaraq, gündəlikdəki məsələləri elmi şura üzvlərinin nəzərinə çatdırdı.

Gündəliyin 1-ci məsələsi olan məzunlar haqqında məlumatları Təbiət elmləri və mühəndislik fakültəsinin dekanı Fəxrəndə Əfəndiyeva, İqtisadiyyat və menecment fakültəsinin dekanı Ceyhun Məmmədov, Humanitar, təhsil və sosial elmlər fakültəsinin dekan müavini Aygün Verdiyeva, Təbiət elmləri, sənət və texnologiya yüksək təhsil fakültəsinin dekan müavini Məhəmməd Eldarov və İqtisadiyyat və biznes yüksək təhsil fakültəsinin dekanı İnqilab Əhmədov təqdim etdilər. Universitetin məzun olan bakalavriatura və magistratura tələbələri, onların qiymətləri, ixtisasları və s. haqqında ətraflı məlumat dinlənildi və müzakirələr aparıldı.

Sonra Təbiət elmləri, sənət və texnologiya yüksək təhsil fakültəsinin dekan müavini tərəfindən şura üzvlərinə magistratura tələbələrinin tezis mövzuları və elmi rəhbərləri barədə məlumat verildi. Məsələ ətraflı müzakirə olundu.

Gündəlikdəki üçüncü məsələ olan doktorant və dissertantların dissertasiya mövzularının, elmi rəhbərlərinin təsdiqi və dəyişdirilməsi haqqında məlumat şura üzvlərinə Təbiət elmləri, sənət və texnologiya yüksək təhsil fakültəsi və İqtisadiyyat və biznes yüksək təhsil fakültəsi tərəfindən verildi və məsələ geniş müzakirə olundu.

Daha sonra Xəzər Universitetinin Tarix və arxeologiya departamentinin müdiri, tarix üzrə fəlsəfə doktoru Telman Nüsrətoğlunun tərtib etdiyi “Osmanlı diplomatiyasının Cənubi Qafqaz hesabatları” və “Türk dövlətləri və mədəniyyətləri tarixi” adlı dərs vəsaitlərinin, Fizika və elektronika departamentinin rəhbəri fizika üzrə fəlsəfə doktoru, Dos. Fəridə Tatardar və bir neçə həmmüəllifin tərtib etdiyi “Mikroelektronika və Nanoelektronika” adlı dərs vəsaitinin, Dillər və ədəbiyyatlar departamentinin müəllimi, filologiya üzrə fəlsəfə doktoru Ülvi Babasoyun “Ədəbiyyatda postmodernizm” adlı dərs vəsaitinin və eyni departamentin müəllimi filologiya üzrə fəlsəfə doktoru Qardaşxan Əzizxanlının “Çağdaş Azərbaycan şeirinin poetikası” adlı dərs vəsaitinin çapa təqdim olunması haqqında məlumatlar şuranın elmi katibi Günel Bahəddinova tərəfindən təqdim olundu və iclas iştirakçıları tərəfindən məsələ ilə bağlı müzakirə aparıldı.

Elmi şuranın gündəliyində duran cari məsələlər qismində ilk növbədə universitetin vebsaytının yenilənməsi üçün məlumatların qısa müddətdə şirkətə təqdim olunması müzakirə edildi. Sonra 2023-cü il iyulun 9-da keçiriləcək məzunluq tədbirinin təşkilatçılığı ilə bağlı Təbiət elmləri və mühəndislik fakültəsinin dekanı Fəxrəndə Əfəndiyeva tərəfindən ətraflı məlumat verildi.

Elmi şuranın gündəliyindəki bütün məsələlərlə bağlı müsbət qərarlar qəbul edildi.