Azərbaycan Respublikasının Kosmik Agentliyi “Azərkosmos” tərəfindən təşkil edilən “CanSat Azərbaycan 2023” müsabiqəsinin 2023-cü il iyulun 5-də keçirilmiş finalında qaliblər elan olunmuşdur. Xəzər Universitetinin “KhazarSat” komandası 2-ci yeri tutmuşdur.

Müsabiqənin davam etdiyi 7 ay ərzində “Xəzər”in tələbələri öyrəndikləri nəzəri bilikləri tətbiq edərək, komandada işləmək və araşdırma bacarıqlarını artırmağa nail olmuşlar.

Musabiqənin şərtlərinə əsasən model peyk daşıyıçı raket vasitəsilə 200 metr hündürlükdən buraxılaraq, bütün hərəkət parametrləri nəzərə alınmaqla müsabiqə komissiyası tərəfindən dəyərləndirilmişdir.

“KhazarSat” komandasının hazırladığı model fərdi təlim və iş birliyinin nümunəsidir. Komandanın mentoru İlkin Nağıyev komandanın 2-ci yerə layiq görülməsində böyük əmək sərf etmişdir. Komandanın hazırladığı model fərdi təlim və iş birliyinin nümunəsidir.

“KhazarSat” komandasının üzvləri: Yerüstü idarə etmə sistemi - Fərid Cənnətov (3-cü kurs, kompüter mühəndisliyi); Mexanika bölməsi - Hüseyn Musayev (1-ci kurs, mexanika mühəndisliyi); İmage processing - Nərmin İsgəndərova ( 2-ci kurs, kompüter elmləri); Elektronika bölməsi - Aysu Məmmədli (1-ci kurs, elektrik və elektronika mühəndisliyi); Programlaşdırma bölməsi - Davud Vahidov ( 1-ci kurs, kompüter mühəndisliyi); Programlaşdırma bölməsi - Əminə Əliyeva (2-ci kurs, kompüter mühəndisliyi).

Qeyd edək ki, “CanSat Azərbaycan 2023” müsabiqəsinə 14 universitetdən 42 komanda qeydiyyatdan keçmiş, yalnız 8 komanda final mərhələsində iştirak etmək hüququ qazanmışdır.

Birinci yerə ADA Universitetinin, üçüncü yerə isə Aviasiya Akademiyasının komandası layiq görülüb.

Sonda “Azərkosmos”un İdarə Heyətinin sədri Saməddin Əsədov qaliblərə sertifikat təqdim edib.

İyulun 5-də Xəzər Universitetinin rektoru İradə Xəlilova və prorektor İsaxan İsaxanlı “KhazarSat” komandasının mentoru və üzvləri ilə görüşərək, onları böyük nailiyyət münasibətilə təbrik etmişlər.