2023-cü il iyunun 16-da Xəzər Universitetində İqtisadiyyat və menecment departamentinin təşkilatçılığı ilə “Dayanıqlı inkişafın sahələrarası aspektləri” mövzusunda beynəlxalq forum keçirildi. Forum dayanıqlı inkişafın müxtəlif aspektləri üzrə elmi tədqiqat nəticələrinin yayılması, inteqrasiyası, nəticələrin tətbiqi və müxtəlif tədqiqatçıların mövzu ətrafında elmi müzakirəsi məqsədilə təşkil olunmuşdu.
Tədbir İqtisadiyyat və menecment fakültəsinin dekanı Dr. Ceyhun Məmmədovun açılış nitqi ilə başladı. Dr. Məmmədov dayanıqlı inkişafın iqtisadi, sosial və ekoloji aspektlərini əhatə edən multidissiplinar və interdissiplinar xarakterli forum barədə məlumat verərək, məruzəçiləri təqdim etdi.
Sonra İqtisadiyyat və menecment departamentinin müəllimi Həsən Rəhimlinin moderatorluğu ilə forum davam etdirildi. Azərbaycan Dövlət İqtisad Universitetinin Qarabağ İqtisadi Araşdırmalar Mərkəzinin rəhbəri, iqtisad elmləri doktoru, professor Şəfa Əliyev “Qarabağın sosial-iqtisadi potensialının Azərbaycan iqtisadiyyatının dayanıqlı inkişafında rolu”, Xəzər Universitetinin İqtisadiyyat və biznes yüksək təhsil fakültəsinin dekanı, iqtisad elmləri doktoru, professor İnqilab Əhmədov “Dayanıqlı sosial inkişaf məqsədləri: mövcud vəziyyət və gözləntilər”, UNEC Nizami Gəncəvi adına Dayanıqlı İnkişaf və Yaşıl İqtisadiyyat Tədqiqat Mərkəzinin rəhbəri, Dr. Gülnar Məhərrəmova “Yaşıl iqtisadiyyata keçid: problemlər və perspektivlər”, Danimarkanın Roskilde Universitetinin dosenti Dr. Fuad Mehrəliyev “Texnologiya və dayanıqlı turizm”, Polşanın Vistula Universitetinin dosenti Dr. Şəhriyar Muxtarov “Bərpa olunan enerji və ümumi faktor məhsuldarlığı vasitəsilə RECAI ölkələrində yüksək dekarbonizasiyaya nail olmaq”, İqtisadi Resursların Öyrənilməsi Mərkəzinin İdarə heyətinin sədri, Xəzər Universitetinin müəllimi, iqtisad üzrə fəlsəfə doktoru Ruslan Atakişiyev “Kiçik və orta sahibkarlığın maliyyə dayanıqlığının təmin olunmasında alternativ maliyyə mənbələrinin rolu”, Xəzər Universitetinin müəllimi, iqtisad üzrə fəlsəfə doktoru Qəhrəman Yusupov “Dayanıqlı turizmin inkişaf problemləri” və Koç Holdinqin Token Finansal Teknolojiler şirkətinin meneceri Sabir Zeynallı isə “Dayanıqlı inkişaf və korporativ sosial məsuliyyət: Azərbaycan örnəyi” mövzularında məruzə etdilər.
İnteraktiv üsulla keçirilmiş görüşdə dayanıqlı inkişafın müxtəlif aspektlərinə dair fərqli baxışlar müzakirə olundu. Qonaq mütəxəssislər və tələbələr də mövzu ilə bağlı öz fikir və mülahizələrini bildirdilər, həmçinin tədqiqatçılara suallarını verdilər.