Görkəmli pedaqoq, “Dünya” məktəbinin yaradıcısı və qurucusu Nailəxanım İsayevanın “Xoşbəxtlik göydən düşmür...” adlı kitabı Xəzər Universiteti Nəşriyyatında çap olunub.

Kitabın tərtibatçıları Afaq Qəmbərova və Hamlet İsaxanlı, redaktoru İsaxan İsaxanlı, rəssamı Rafiq Mirəbdülrəhimovdur. Kompüter işini Nərminə Qasımova yerinə yetirmişdir.

Kitabın “Ana qucağı ən isti, ən sevimli qucaqdır...” adlanan birinci fəsli Nailəxanım İsayevanın uşaqlıq dövründən başlayaraq həyatının son illərinə qədər qələmə aldığı xatirələrdən ibarətdir. Fəslin sonuna əlavə olaraq Nailəxanım İsayevanın İsaxan İsaxanlının 50 illik yubileyindəki çıxışı (15 fevral 2012-ci il) və İsaxan İsaxanlının xəstəxanada onunla görüşü haqqında “Qayğıkeş mələyə notlar...” adlı qısa xatirəsi verilmişdir.

“Məktublar” adlanan ikinci fəsil Hamlet İsaxanlının “Nailəxanımın məktubları haqqında” adlı ön sözündən, Nailəxanım İsayevanın Hamlet İsaxanlıya göndərdiyi 11 məktubdan və nəvəsi Canana yeddi yaşı münasibətilə yazdığı təbrik məktubundan ibarətdir.

“Bu da bir həyatdı...” adlı üçüncü fəsildə Nailəxanım İsayevanın əsasən “Dünya” məktəbinin fəaliyyəti ilə bağlı keçirilmiş tədbirlərdəki çıxışları verilmişdir. Xəzər Universiteti və “Dünya” məktəbinin müəllimi olmuş görkəmli folklorşünas alim, Əməkdar elm xadimi Bəhlul Abdulla haqqındakı “Bəhlul Abdulla – sevgi dolu alim və pedaqoq” adlı kitaba Nailəxanım İsayevanın redaktor kimi yazdığı ön söz də bu fəsildə yer almışdır. “Dünya” məktəbinin məzunları da sevimli müəllimləri, “Dünya” Təhsil Kompleksinin direktoru Nailəxanım İsayeva haqqında minnətdarlıq sözlərini bu fəsildə bölüşürlər.

Kitabın “Əlavələr” bölümündə Nailəxanım İsayevanın həyat tarixçəsi və xatirəsinin əbədiləşdirilməsi üçün həyata keçirilən tədbirlər silsiləsi əks olunmuşdur.

Kitab boyu xalq artistləri Gülyanaq Məmmədova, Brilliant Dadaşova, İlqar Muradov, Ramiz Həsənoğlu, Flora Kərimova, Əməkdar incəsənət xadimi Cavanşir Quliyev, fizika-riyaziyyat elmləri doktoru, professor İlham Pirməmmədov və tarix elmləri doktoru, professor Solmaz Rüstəmova-Tohidinin Nailəxanım İsayeva haqqında ürək sözlərini ifadə edirlər.

Kitab əhatəli və dərin məzmunu, zəngin fotomaterialı və nəfis tərtibatı ilə görkəmli təhsil təşkilatçısı və pedaqoq, unudulmaz insan Nailəxanım İsayevanın əziz xatirəsinə layiqli töhfədir.