2023-cü il iyunun 2-4-də İqtisadiyyat Nazirliyi yanında Dövlət Vergi Xidməti (DVX) və “PwC Azərbaycan” şirkətinin birgə təşkilatçılığı ilə ali təhsil müəssisələrinin tələbələri arasında Ulu Öndər Heydər Əliyevin xatirəsinə həsr olunmuş “Vergilər” mövzusunda ümumrespublika olimpiadasının yekun mərhələsi keçirilib. DVX-nın Tədris Mərkəzinin Şamaxıda yerləşən inzibati binasında təşkil olunan olimpiadanın yekun mərhələsinə ölkənin 20 universitetindən 100 tələbə qatılıb. Yekun mərhələsi imtahan test sualları əsasında aparılıb, suallar vergi sistemi və vergi qanunvericiliyi üzrə mürəkkəblik dərəcəsinə uyğun hazırlanıb. İki növbədən ibarət yekun turun imtahanı 90 dəqiqə davam edib, tələbələr vergilər mövzusunda öz bilik və bacarıqlarını sınayıblar. Yekun mərhələdə ən yüksək nəticə göstərən 3 tələbə uğur qazanaraq, final mərhələsinin qalibi olub. Final mərhələsində 1-ci yeri Xəzər Universitetinin 4-cü kurs tələbəsi (Maliyyə ixtisası) Müseyib Quliyev, 2 və 3-cü yerləri isə müvafiq olaraq Naxçıvan Dövlət Universitetinin tələbələri Nail Mustafazadə və Nicat Məmmədli tutublar.

Qaliblərə mükafatlar və sertifikatlar təqdim olunub. Bununla yanaşı, qalib tələbələr həm Dövlət Vergi Xidməti, həm də “PwC Azərbaycan” tərəfindən keçirilən təcrübə proqramlarına qatılma imkanı əldə ediblər ki, bu da onlara gələcəkdə iş prosesinə cəlb olunmalarına şərait yaradacaq.

Ölkə saytları tədbir haqqında xəbər yayımlayıb.

https://newscenter.az/2023/06/05/vergiler-movzusunda-umumrespublika-olimpiadasinin-yekun-merhelesi-kecirilib.html