2023-cü il mayın 29-dan iyunun 2-dək İqtisadiyyat və biznes yüksək təhsil fakültəsinin dekanı İnqilab Əhmədov və Beynəlxalq əlaqələr ofisinin koordinatoru Fatimə Vəliyeva Erasmus+ İşçi heyətinin mübadiləsi proqramı (KA107) çərçivəsində Portuqaliyanın Bragança Politexnik İnstitutunda keçirilmiş Beynəlxalq Mobillilik Həftəsində iştirak etmişlər.

Proqramın ilk günü universitetin Akademik işlər və beynəlxalq əlaqələr üzrə prorektoru Luis Pais iştirakçılar ilə görüşdü və universitet haqqında təqdimat nümayiş olundu. Həmçinin, ikili diplom proqramlarının məqsədləri, növbəti əməkdaşlıqlar müzakirə edildi.

Sonra universitetin fakültələri (Kənd Təsərrüfatı, Təhsil, Texnologiya və Menecment, Səhiyyə) ilə görüşlər keçirildi və kitabxanalar ilə tanışlıq oldu.

Ümumilikdə tədbirdə təmsil olunan 18 ölkədən 59 iştirakçı qruplara bölünərək, tədqiqatyönümlü və ikili diplom proqramları ilə bağlı vörkşoplarda iştirak etdilər.

Həftədə iştirak edən universitet nümayəndələrinin Erasmus+ Tələbə Mübadilə Proqramı ilə hal-hazırda təhsil alan tələbələrlə görüşü təşkil olundu. Xəzər Universitetinin əməkdaşları universitetin İqtisadiyyat və menecment fakültəsinin ikili diplom proqramı ilə təhsil alan Nərminə Bağışova və Erasmus+ Mübadilə Proqramı çərçivəsində Təbiət elmləri və mühəndislik fakültəsinin tələbəsi Fatimə İbrahimova ilə görüşərək, təəssüratları ilə maraqlandılar.

Proqram iştirakçılarının Bragança şəhərinə və qalasına ekskursiyası da təşkil olundu.