2023-cü il mayın 31-də Xəzər Universiteti Çin Tədqiqatlar Mərkəzinin təşkilatçılığı ilə “China Time Lectures” layihəsinin ilk seminarı keçirilmişdir. Seminarda iştirak üçün Xəzər Universitetinin dəvəti ilə Çin İctimai Elmlər Akademiyasının nümayəndə heyəti universitetə səfər etmişdir. Qonaqları universitetin rektoru İradə Xəlilova qəbul etmiş, qarşılıqlı maraq doğuran əməkdaşlıq məsələləri ilə bağlı fikir mübadiləsi aparılmışdır.
Seminarda məruzəçi qismində Çin İctimai Elmlər Akademiyası Rusiya, Şərqi Avropa və Mərkəzi Asiya İnstitutunun direktor müavini, professor Tyen Dıven “Çin üslubunda modernləşmə və ‘Kəmər və Yol’ təşəbbüsü çərçivəsində xarici siyasət” mövzusunda çıxış etmişdir. Natiq müasir Çinin başlıca inkişaf məqsədinin Çin üslublu müasirləşmə olduğunu diqqətə çatdırmışdır. Eyni zamanda vurğulanmışdır ki, “Kəmər və Yol” təşəbbüsü Çinin modernləşmə siyasətinin əsas komponenti olmaqla yanaşı, həm də dünya ölkələri ilə əməkdaşlığının yeni və məhsuldar bir vasitəsidir. Bundan başqa, natiq müasir Çinin inkişaf yolu, əldə olunmuş nailiyyətlər, “Kəmər və yol” təşəbbüsü çərçivəsində qarşılıqlı mənfəət əsasında dünya xalqları ilə əməkdaşlıq məsələlərini dinləyicilərin diqqətinə çatdırmışdır. Sonda məruzəçiyə Xəzər Universiteti adından sertifikat təqdim edilmişdir.
Xəzər Universitetinin Çin Tədqiqatlar Mərkəzi 2022-ci ilin oktyabrında Ümumdünya Çinşünaslıq Mərkəzi ilə birgə əməkdaşlıq çərçivəsində təsis edilmişdir. Mərkəz Çin üzrə tədqiqatlar üzrə ixtisaslaşmışdır.