2023-cü il mayın 25-də Xəzər Universitetində “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə xaricdə doktorantura təhsili” proqramı çərçivəsində Azərbaycan Respublikasının Təhsil Nazirliyi və Xəzər Universiteti ilə üçtərəfli müqavilə əsasında Birləşmiş Krallığın "Imperial College London" Universitetində təhsil alan doktorant Nərmin Axundovanın Zoom platforması vasitəsilə onlayn seminarı təşkil edilmişdir.

Seminarda Nərmin Axundova hazırda üzərində çalışdığı elmi tədqiqat haqqında məlumat vermiş və əldə etdiyi ilkin nəticələri təqdim etmişdir. Çıxışda xroniki obstruktiv ağciyər xəstələri nümunəsi üzərində əzələ itkisinə yol açması ehtimal edilən bioloji yollardan, həmin mexanizmlərdə iştirak edən genlərdən və bu genlərin tənzimlənməsində rol aldığı ehtimal edilən mikroRNA-lardan bəhs edilmişdir.

Seminar Həyat elmləri departamentinin akademik heyəti və tələbələrinin marağını cəlb etmiş və mövzu ətrafında müzakirələr aparılmışdır.