2023-cü il mayın 22-26-da Neft mühəndisliyi departamentinin müdiri Dr. Elşən Abdullayev, rektorun assistenti və Kompüter mühəndisliyi departamentinin müəllimi Humay Hüseynova və Beynəlxalq əlaqələr ofisinin koordinatoru Fatimə Vəliyeva Erasmus+ İşçi heyətinin mübadiləsi proqramı (KA107) çərçivəsində İtaliyanın Tuscia şəhərində yerləşən Tuscia Universitetində (Università degli Studi della Tuscia) keçirilmiş Beynəlxalq İşçi Həftəsində iştirak etmişlər.
Proqramın ilk günü universitetin rektoru Prof. Stefano Ubertin və Beynəlxalq əlaqələr üzrə prorektor Prof. Simone Severini iştirakçılar ilə görüşdülər və Beynəlxalq İşçi Həftəsinin məqsədləri, həmçinin universitet haqqında təqdimat nümayiş olundu.
Tədbirdə müxtəlif ölkələrdən nümayəndələr iştirak edirdilər. Beynəlxalq əlaqələr ofisinin koordinatoru Fatimə Vəliyeva Xəzər Universiteti və universitetin fakültələri, tələbələrə təklif etdiyi təqaüdlər, beynəlxalq imkanlar, əməkdaşlıqlar haqqında təqdimatla çıxış etdi.
Proqramın növbəti günlərində Prof. Giuseppe Calabro innovativ və inklüziv tədris haqqında təqdimat nümayiş etdirdi. Prof. Sonia Melchiorre administrativ kommunikasiyada müxtəliflik və inklüzivlik haqqında məlumat verdi. Layihə koordinatoru Dr.İsabella Querci tərəfindən innovativ təcrübə-tədqiqat istiqamətində vörkşop keçirildi.
Həftədə iştirak edən universitet nümayəndələrinin Tuscia Universitetində Erasmus+ Tələbə Mübadilə Proqramı ilə hal-hazırda təhsil alan tələbələrlə görüşü təşkil olundu. Xəzər Universitetinin əməkdaşları universitetin Təbiət elmləri və mühəndislik fakültəsinin Neft-qaz mühəndisliyi ixtisasının 3-cü kurs tələbəsi Seymur Mirzəliyevlə görüşərək, təəssüratları ilə maraqlandılar.
Proqram iştirakçılarının Bolsena gölünə səfəri təşkil edildi, universitetin kampusunda axşam ziyafətinə dəvət olundular.
Proqramın sonunda iştirakçılara sertifikat təqdim edildi.