2023-cü il mayın 25-də Karyera Mərkəzinin təşkilatçılığı ilə Xəzər Universitetində Expressbank ustad dərsi keçirmişdir. Ustad dərsində İqtisadiyyat və menecment fakültəsinin Kompüter elmləri ixtisası, Kompüter mühəndisliyi ixtisasında bakalavr pilləsi üzrə təhsil alan 3-4-cü kurs tələbələri və magistr pilləsi üzrə təhsil alan tələbələr iştirak etdilər. Tədbirin məqsədi tələbələrin Expressbankın komandasının üzvləri və təşkilati strukturu ilə daha yaxından tanış edilməsi, gənclər üçün karyera və təcrübə imkanlarının yaradılması və keçirilən müsabiqələr, sınaq müsahibələri və bank işi ilə praktik tanışlıq idi.

Expressbankın Təlim tədris şöbəsinin mütəxəssisi Nigar İsayeva bankın təşkilatçılığı ilə keçirilən yarışlar, şirkətdəki karyera ilə bağlı inkişaf imkanları, bank üçün vacib olan şəffaflıq, innovativlik və s. haqqında məlumat verdi. Xidmət üzrə mütəxəssislər - Lalə Salmanova və Həşim Əlizadə müştərini tanıma prinsipləri haqqında danışdılar və bu zaman təlimin digər hissələrində də olduğu kimi, məlumat verilməklə yanaşı, interaktiv olaraq sual-cavab aparıldı.

Bankın əməkdaşları Nəzrin Nadirli və Samir Osmanov satış ilə bağlı öz dəyərli məlumatlarını tələbələrlə paylaşdılar və bu zaman ustad dərsinin ən maraqlı hissələrindən biri olan yarış keçirildi. 3 könüllüdən onlara verilən əşyaların digər tələbələrə “satış edilməsi” istənildi və səsvermə keçirildi, yarışın sonunda tələbələrin üçü də hədiyyələr ilə təltif olundu.

İşçilərin işə Cəlb olunması və Motivasiya Şöbəsinin müdiri Cəmilə Dadaşova iki gənc ilə nümunə xarakterli sınaq - müsahibə keçirdi.

Təlimin sonunda İnsan resursları Departamentinin direktoru Ləman İmanova tələbələrə sertifikatı təqdim etdi.