2023-cü il mayın 21-də Xəzər Universiteti Gəncə “Dünya” məktəbində Ümummilli Lider Heydər Əliyevin anadan olmasının 100-cü ildönümünə həsr olunmuş İncəsənət və İdman Festivalının açılışı oldu. Festivalın əsas məqsədi istedadlı şagirdləri üzə çıxarmaq, region məktəbləri arasında elm və təhsil sahəsində mübadilələr üçün şərait yaratmaq və dostluq əlaqələri qurmaqdır.

Üç mərhələdən ibarət festivalda 6-18 yaş arası şəxslər iştirak edəcək. Festival ümumilikdə 11 nominasiya - instrumental ifaçılıq, robotexnika, solo ifaçılıq, minifutbol, voleybol, karate-do, rəsm və rəngkarlıq, inşa, bədii qiraət və aktyorluq, şahmat və rəqs üzrə keçirilir.

Festivalın açılışında Xəzər Universitetinin təsisçisi, Direktorlar və Qəyyumlar Şurasının sədri professor, akademik Hamlet İsaxanlı, Xəzər Universiteti və Bakı “Dünya” Məktəbinin əməkdaşları, Gəncə-Daşkəsən Regional Təhsil İdarəsi, Gəncə Şəhər İcra Hakimiyyəti, Gəncə Yazıçılar Birliyi, Gəncə Gənclər Evi və digər təşkilatlardan nümayəndələr, millət vəkilləri, regionun tanınmış incəsənət adamları, məktəb direktorları, məktəblilər və valideynlər iştirak edirdilər.

Məktəblilərin nominasiyalara bölünərək keçdikləri parad, rəqslər, çıxışlar festivalın açılışında böyük təntənə yaratdı.

Festivalda hər iştirakçı fərdi olaraq yalnız bir nominasiya üzrə iştirak edə bilir. İkinci mərhələ may ayının sonunda təşkil ediləcəkdir. İkinci mərhələdə fərqlənən iştirakçılar final mərhələsinə vəsiqə qazanacaqlar. Festivalın final mərhələsi isə iyun ayının ilk 10 günlüyündə “Qala gecəsi” formasında təşkil olunacaqdır. Qaliblər müxtəlif hədiyyə və diplomlarla mükafatlandırılacaqlar.