Təhsil səviyyəmdə yeni bir pilləyə yüksəldim

Mən Xəzər Universitetinin Humanitar, təhsil və sosial elmlər fakültəsinin İngilis dili müəllimliyi ixtisası üzrə 4-cü kurs tələbəsiyəm.

Erasmus+ Tələbə Mübadilə Proqramı çərçivəsində Türkiyənin İstanbul Aydın Universitetində bir semestr ərzində təhsil almışam.

Mübadilə proqramımın əsasü hissəsi müəllimlik təcrübəsi idi. Məlum olduğu kimi, müəllimlik ixtisasında təhsil alan bütün 4-cü kurs tələbələrindən 2 semestr ərzində öz peşəsi üzrə təcrübə keçməsi tələb olunur. Mənim təcrübə keçdiyim məktəb “CND okullari” idi. Orada həm dərs demək, həm də dərsləri müşahidə etmək imkanım oldu. “CND okullari”nda ingilis dili əsas dil olduğuna görə tələbələrin əksəriyyəti əcnəbi idi.

Mübadilə proqramımın gözəl tərəflərindən biri o idi ki, illərdir internet üzərindən tanıdığım pakistanlı dostum da İstanbul Aydın Universitetinin tələbəsi idi. Dostum mənə urdu dilini, mən isə ona Azərbaycan dilini öyrədirdim.

Proqramın təşkil etdiyi “Beynəlxalq Kulinariya Günü” adlı tədbirdə də iştirak etdim. Orada iştirak edən hər kəs öz ənənəvi yeməklərini hazırlamalı idi. Bu zaman biz müxtəlif yeməklərlə tanış olmaqla yanaşı, həmçinin, digər ölkələr haqqında da məlumatlar əldə etdik.

Ümumilikdə, cəmi beş ay ərzində Erasmus mənə böyük təcrübə və çoxlu xatirələr bəxş etdi. Bu proqram sayəsində həm dünyanın bir çox ölkəsindən olan tələbələrlə tanış oldum, həm də öz təhsil səviyyəmdə yeni bir pilləyə yüksəldim.

Əsmər Paşayeva