2023-cü il mayın 5-də Karyera Mərkəzinin təşkilatçılığı ilə AIESEC-in Azərbaycan nümayəndəliyi - “AIESEC Azərbaycan”ın əməkdaşı və fəalları Xəzər Universitetində oldular. Tədbirdə Lokal Komitə üzrə Marketinq Departmentinin rəhbəri Nizami Baxşəliyev “AİESEC Azərbaycan” haqqında ümumi məlumat verdi.

AIESEC təşkilatı hazırda dünyanın 110 ölkəsində 1300-dən çox universitetin 38 min tələbə və məzunlarını əhatə edən, BMT-də məsləhətçi statusu olan ən böyük tələbə təşkilatıdır. AIESEC gənclərin şəxsi və professional inkişafına istiqamətlənmiş bütün təşəbbüslərini müxtəlif təhsil və təlim layihələri, müxtəlif ölkələrdə təşkil olunan konfranslar və beynəlxalq tələbə mübadiləsi proqramlarından istifadə edərək dəstəkləyir və gələcək inkişafına çalışır.

Azərbaycan Respublikasının AIESEC beynəlxalq təşkilatına üzvlüyünün əhəmiyyətini nəzərə alaraq, gənclərin inkişafına kömək məqsədilə nümayəndəlik bu beynəlxalq təşkilata 2006-cı ildə Gənclər və İdman Nazirliyinin dəstəyi ilə üzv olub, 2009-cu ildə isə "AIESEC Azərbaycan" – beynəlxalq stajkeçmə proqramı tam hüquqlu üzv statusu əldə edib.

Sonra tələbələrə beynəlxalq stajkeçmə proqramları - “Global Talent”,”Global Teacher” və “Global Volunteer” layihələri haqqında məlumat verildi. “Global Talent” layihəsi dünya miqyasında müxtəlif sahələrdə təcrübə və mübadilə proqramları təklif etməklə tələbələrə peşəkar inkişaf imkanları yaradır. “Global Teacher” layihəsi xaricdə təhsil imkanları təmin etməklə təhsilin keyfiyyətini yüksəltmək məqsədi daşıyır. “Global Volunteer” BMT-nin Dayanıqlı İnkişaf Məqsədləri üzərində əsaslanmış könüllü təcrübə proqramıdır. Proqramda iştirak edərək beynəlxalq komandada işləmək və praktiki təcrübə qazanmaq mümkündür.

Tədbir zamanı layihə iştirakçıları bu proqramlara cəlb olunmaları ilə bağlı öz təcrübələrini və fikirlərini bölüşüblər. Vəfa Balakişiyeva özünün Polşa səyahəti üçün niyə bu ölkəni seçdiyi, hansı təcrübələr qazandığı haqqında danışdı. Digər iştirakçı Nərmin Dibirova Şri-Lankada turizm sahəsində təcrübəsi barədə təəssüratlarını bölüşdü.

Nümayəndələr “Global Host” layihəsi ilə də tələbələri tanış etdilər, Səbinə Yusubova onlara qəbul şərtləri haqqında ətraflı məlumat verdi.

Sonda tələbələrin sualları cavablandırıldı.