2023-cü il aprelin 17-21-də Xəzər Universitetinin əməkdaşları ERASMUS+ PICASP layihəsi çərçivəsində Polşanın Varşava Universitetində olmuş, “Təhsil və biznes strategiyalarında mədəni irs” adlı seminarda iştirak etmişlər.

Tədbirdə Xəzər Universiteti İqtisadiyyat və menecment fakültəsinin dekanı Dr.Ceyhun Məmmədov, Təbiət elmləri, sənət və texnologiya yüksək təhsil fakültəsinin dekan müavini Dr.Məhəmməd Eldarov, İqtisadiyyat və menecment departamentinin koordinatoru Dr.Bahadır Baysal, İnkişaf Ofisinin Layihə meneceri Səlimə Əhmədova, Tarix və arxeologiya departamentinin müəllimləri Dr. Bayram Quliyev, Kəmalə Mustafayeva və Karyera Mərkəzinin meneceri Səbinə Allahverənova ilə təmsil olunmuşdur.

PICASP layihəsinin (Xəzər regionunun inkişafını dəstəkləmək məqsədilə universitet-sənaye əməkdaşlığını həyata keçirən təcrübə müəssisələri pilot kursları) əsas məqsədləri Təcrübə Müəssisəsi ilə yeni tədris metodları hazırlamaq, Sahibkarlıq və KOM-ların idarə edilməsi üzrə kurslar təşkil etmək, Aİ tərəfdaşları ilə təcrübə mübadiləsini artırmaq və maraqlı tərəflərin kurikulumların hazırlanmasında və məzunların məşğulluğunda iştirakını təmin etməkdir.

Seminar mədəni irs sahəsindəki təcrübə və problemlərin müzakirəsinə həsr olunmuşdu: arxeoloji irsin araşdırılması və sənədləşdirilməsi metodları; qanunsuz dövriyyəyə qarşı mübarizə və mədəni irsin qorunması; II Dünya müharibəsindən sonra Varşavanın bərpası; Varşava Universiteti Muzeyinin tarixi; Bolqarıstan və Rumıniyada irsin idarə olunması, turizm problemləri və onların həlli yolları; Polşada kommersiya arxeologiyası; əsas problemlər və inkişaf perspektivləri; mədəni irs sahəsində yetkinlərin təhsili. Bundan əlavə, Xəzər Universitetinin əməkdaşları Varşavanın tarixi mahiyyətinin müharibədən sonrakı rekonstruksiyası, köhnə post-sənaye və sosialist binalarının mədəni və işgüzar məqsədlər üçün uyğunlaşdırılması üzrə sahə işlərində iştirak etmişlər.

İdarəetmə görüşündə Dr. Ceyhun Məmmədov Xəzər Universitetində layihə fəaliyyətlərinin həyata keçirilməsi və qarşıya qoyulan məqsədlərin reallaşdırılması haqqında, Səlimə Əhmədova layihənin idarə olunması məsələləri ilə bağlı ətraflı məlumat verdilər.

Görüş cari nəticələrin, ehtiyacların, gözləntilərin və gələcək planların müzakirəsi ilə başa çatdı.