Xəzər Universitetində PICASP layihəsi çərçivəsində İqtisadiyyat və menecment fakültəsi və İnkişaf Mərkəzinin birgə təşkilatçılığı ilə MIRAS Mədəni İrsin Öyrənilməsinə Kömək İctimai Birliyi tərəfindən 2023-cü il aprelin 27-də bakalavr pilləsi üzrə təhsil alan turizm ixtisası tələbələrinin və müəllim heyətinin iştirakı ilə “Arxeoloji irsin qorunmasının təşkili” mövzusunda seminar təşkil edilmişdir.

Seminarı Xəzər Universitetinin İqtisadiyyat və menecment fakültəsinin dekanı Dr. Ceyhun Məmmədov açaraq, PİCASP layihəsi, MİRAS ilə əməkdaşlıq və turizmin dayanıqlı inkişafda rolu barədə ətraflı məlumat vermişdir.

Sonra Layihənin milli tərəfdaşı qismində MİRAS İctimai Birliyinin inzibati rəhbəri, tarix üzrə fəlsəfə doktoru Fariz Xəlilli məruzə ilə çıxış etmişdir.

Seminar arxeoloji tədqiqatların aparılması, tapılan daşınar və daşınmaz arxeooji tapıntıların qorunması və saxlanması, ölkə daxilində və xaricdə təşkil olunan arxeoloji sərgilər, arxeoloji muzeyləşdirmə, ölçü işlərinin aparılması, konservasiya məsələləri, beynəlxalq təcrübə və s. mövzuları əhatə etmişdir.

Seminarda, həmçinin, “Orta Əsr Ağsu Şəhəri” arxeoloji turizm kompleksinin nümunəsində arxeoloji irsin qorunmasının müxtəlif aspektləri müzakirə edilmiş, arxeoloji irsin qorunması istiqamətində MİRAS tərəfindən həyata keçirilən maarifləndirici layihələr (tanışlıq turları, arxeologiya düşərgələri, məktəblilər üçün yay arxeoməktəbi və s.) barədə məlumat verilmişdir. Seminar hibrid formatda təşkil olunmuşdur.

MİRAS-PICASP seminarlarının məqsədi Xəzər bölgəsində mədəni irs, arxeologiya, muzeylər, turizm sahəsində universitet-müəssisə əməkdaşlığına zəmin hazırlamaqdır. Layihənin əsas məqsədi yeni öyrənmə vasitəsi olan açıq ödənişsiz onlayn kursların (MOOCs) tətbiqi ilə nəzəriyyə və təcrübəni birləşdirən pilot kurslar əsasında kiçik və orta biznes sahəsində müəllimlərin kompetensiyalarının artırılması, yeni metodologiya və tədris vasitələrinin təqdim olunması, mədəni irsin qorunması sahəsində kadr hazırlığı səviyyəsinin yüksəldilməsi, xüsusilə ali təhsil sahəsində potensialın gücləndirilməsindən ibarətdir.