2023-cü il aprelin 28-də Xəzər Universiteti Kitabxana İnformasiya Mərkəzinin təşkilatçılığı ilə universitetdə təsisçisi Elm və Təhsil Nazirliyi olan “Azərbaycan məktəbi” elmi-nəzəri-pedaqoji jurnalının təqdimatı oldu. Tədbirdə jurnalın rəhbərliyi və universitet əməkdaşları iştirak edirdilər.
Tədbiri giriş sözü ilə Humanitar, təhsil və sosial elmlər fakültəsinin dekanı, “Azərbaycan məktəbi” jurnalının redaksiya heyətinin üzvü, dosent Elza Səmədli açaraq, qonaqları salamladı, jurnal ilə əməkdaşlığı haqqında danışdı.
Jurnalın baş redaktoru Arzu Soltan jurnalın yaranması, fəaliyyəti haqqında məlumat verdi. Qeyd etdi ki, jurnal 99 ildən artıq müddətdə təhsil sisteminin yeniləşməsində, təlim-tərbiyə işinin keyfiyyətinin yüksəldilməsində, mütərəqqi tədris metod və formalarının təbliğində, qabaqcıl təcrübənin öyrənilib yayılmasında, görkəmli alimlərin fikir və ideyalarının cəmiyyətə təqdim olunmasında, elmi, pedaqoji təfəkkürün formalaşmasında əhəmiyyətli rol oynayıb və bu gün də jurnalda elmi ictimaiyyət nümayəndələrinin, pedaqoqların, psixoloqların təhsilin aktual problemləri, fəlsəfəsi, tarixi ilə bağlı məqalələri dərc olunur.
Baş redaktorun müavini Nəsrəddin Musayev çıxışında jurnala əlavə kimi müxtəlif illərdə 8 adda metodik məcmuənin çap edildiyini və onlardan bəzilərinin bu gün də dərc olunduğunu bildirdi. O, jurnalın Azərbaycan Respublikasının Prezidenti yanında Ali Attestasiya Komissiyasının qərarı ilə dissertasiyaların əsas nəticələrinin dərc olunması tövsiyə edilən nəşrlər sırasına daxil edildiyi haqqında da məlumat verdi və sualları cavablandırdı.
Redaksiya tərəfindən Kitabxana İnformasiya Mərkəzinə jurnallar hədiyyə olundu.