2023-cü il martın 13-17-də Türkiyənin İstanbul şəhərində yerləşən Sabancı Universitetinin professoru Ahmet Demirelli Erasmus+ İşçi heyətinin Mübadilə Proqramı (Teaching Mobility) çərçivəsində Xəzər Universitetinin Təbiət elmləri və mühəndislik fakültəsi və Beynəlxalq əlaqələr ofisi tərəfindən qəbul edildi.

Proqramın ilk günü fakültə və ofisin əməkdaşları ilə tanışlıq görüşü keçirildi.

Proqram ərzində Kompüter elmləri departamentinin koordinatoru Cavad Mehri qonağı departamentin fəaliyyəti ilə yaxından tanış etdi. Ahmet Demirelli “Obyekt yönümlü proqram təminatının dizaynı və proqramlaşdırması”; “Korporativ proqram arxitekturası”; “Böyük verilənlər”; “Bulud texnologiyası” (“Object Oriented Software Design and Programming”; “Enteprise Software Architectures”; “Big Data”; “Cloud Technologies”) mövzularında tələbələrə mühazirə oxudu.

Proqrama uyğun olaraq universitetin Kitabxana İnformasiya Mərkəzində direktor müavini Aytac Misgərli professora mərkəzin fəaliyyəti haqqında məlumat verdi. Nailəxanım Mədəniyyət Mərkəzində o, Nailəxanım İsayevanın həyat və fəaliyyətini əks etdirən eksponatlarla tanış oldu. Fizika və elektronika departamentinin müdiri Fəridə Tatardar qonağı departament və Nanotexnologiya laboratoriyasının fəaliyyəti ilə tanış etdi.

Proqramın sonunda Təbiət elmləri və mühəndislik fakültəsinin dekanı Fəxrəndə Əfəndiyeva tərəfindən Ahmet Demirelli`yə sertifikat təqdim olundu..