2023-cü il martın 18-də Xəzər Universiteti Beynəlxalq əlaqələr ofisinin təşkilatçılığı ilə universitetdə təhsil alan əcnəbi tələbələr üçün Novruz şənliyi keçirildi. Beynəlxalq əlaqələr üzrə prorektor Vlad Vernygora bayram münasibətilə tələbələri təbrik etdi və Novruz haqqında öz təəssüratlarını bölüşdü. Tələbə məclisinin rəhbərliyi, Beynəlxalq əlaqələr ofisinin əməkdaşları - Arzu Bədəlova, Fatimə Vəliyeva və Hüseyn Əliyev də tələbələri təbrik etdilər.
Beynəlxalq əlaqələr ofisinin koordinatoru Fatimə Vəliyeva tərəfindən Azərbaycanın milli bayramının qədim adət-ənənələrini özündə əks etdirən viktorina keçirildi. Novruz bayramının rəmzləri barədə də ətraflı məlumatın verildiyi görüşdə əcnəbi tələbələr də bayram münasibətilə təbriklərini çatdırdılar, Novruz xonçası ətrafında toplaşaraq, yumurta döyüşdürdülər, Novruz təamlarına qonaq edildilər. Əcnəbi tələbələr universitet rəhbərliyinə dərin təşəkkürlərini bildirdilər.
Bayram şənliyi universitetin rəqs ansamblının (bədii rəhbər Səbinə İsmayılova) ifasında milli rəqslərlə davam etdi.
Şənliyin sonunda xatirə fotoları çəkildi.