Milli Məclisin Mədəniyyət Komitəsinin sədri Qənirə Paşayeva 2023-cü il martın 19-da Xəzər Universitetinin qurucusu, görkəmli riyaziyyatçı alim, şair, yazıçı, publisist, tərcüməçi, professor, akademik Hamlet İsaxanlı ilə universitetdə görüşərək, onu 75 illik yubileyi və Novruz bayramı münasibətilə təbrik edib.

Komitə sədri Xəzər Universitetinin ölkənin ən önəmli təhsil, elm və mədəniyyət ocaqlarından biri olmasını məmnuniyyət və qürur hissi ilə vurğulayaraq, H. İsaxanlıya elmi, pedaqoji, ictimai və ədəbi fəaliyyətində yeni uğurlar arzulayıb, Mədəniyyət Komitəsinin Təbrik məktubunu və xatirə hədiyyələri təqdim edib.

Məktubda professor Hamlet İsaxanlının həyat və fəaliyyətinin ən önəmli məqamları vurğulanıb:

“Hörmətli Hamlet müəllim,

Sizi 75 illik yubileyiniz münasibətilə ürəkdən təbrik edir, Sizə möhkəm cansağlığı, iş avandlığı, elmi və ədəbi yaradıcılığınızda yeni uğurlar diləyirəm!

Siz müxtəlif sahələrdə geniş fəaliyyət özkeçmişinə malik olan ensiklopedik bilikli ictimai, elm və sənət xadimisiz. Siz özünəxas etnoqrafik yaddaşı olan sazlı-sözlü Qarayazı elinin Kosalı kəndində doğulmusuz. 1965-ci ildə orta məktəbi qızıl medalla bitirib Azərbaycan Dövlət Universitetinə (indiki BDU-ya) qəbul olunmuş və 1970-ci ildə ali təhsili fərqlənmə diplomu ilə bitirmisiz. 1970-1973-cü illərdə M.V.Lomonosov adına Moskva Dövlət Universitetində aspiranturada oxumusuz və 1973-cü ildə dissertasiya işini uğurla müdafiə edərək, alimlik dərəcəsi almısız.

1973-1983-cü illərdə Siz Moskva və Bakıda çalışmış, elmi-tədqiqatla və pedaqoji işlə məşğul olmusuz. Keçmiş SSRİ, ABŞ, Almaniya, Böyük Britaniya, Kanada və b. ölkələrdə nüfuzlu elmi jurnallarda, toplularda elmi-tədqiqat əsərləriniz dərc edilib. Siz 1983-cü ildə Moskvada doktorluq dissertasiyasını uğurla müdafiə edərək, elmlər doktoru alimlik dərəcəsi almış, bir qədər sonra isə professor adına layiq görülmüsüz.

1991-ci ildə İngilisdilli Azərbaycan Universitetinin yaradılmasına təşəbbüs göstərmiş, respublika hökumətinin müvafiq qərarları ilə rəsmi status alan bu ali məktəbi qurmağa başlamısız. Azərbaycanın ilk özəl universitetinin qurucu-rektoru olaraq geniş fəaliyyət göstərmisiz. Bir qədər sonra yeni – Xəzər Universiteti adını alan bu elm, təhsil və mədəniyyət ocağı Azərbaycanın dünyada ən yaxşı tanınan sayğın təşkilatlarından biridir.

Siz Azərbaycanda və onun hüdudlarından kənarda təkcə alim və elm-təhsil təşkilatçısı kimi deyil, şair kimi də tanınırsız. Şeirləriniz bir çox dilə çevrilib. Azərbaycanda, Rusiyada, Çində, Güney Azərbaycanda, Türkiyədə, Pakistanda, Gürcüstanda, Finlandiyada və digər ölkələrdə şeir kitablarınız, jurnal, qəzet və poetik toplularda şeir və poemalarınız gün üzü görüb. Sizin yaradıcılığınıza tərcümə işi də daxildir. Siz V.A.Jukovski, F.Baratınski, F.İ.Tyutçev, A.Fet, S.Yesenin, N.Qumilyov, A.Axmatova, A.Axundova, C.Q.Bayron, V.Bleyk, R.Herrik, G.de Nerval və b. rus, ingilis, fransız şairlərinin şeirlərini orijinaldan Azərbaycan türkcəsinə çevirmisiz.

Sözlərinizə Ramiz Mustafayev, Vasif Adıgözəlov, Vaqif Gərayzadə, Lütfiyar İmanov, Cavanşir Quliyev, Tahir Əkbər, Elza Seyidcahan, Cahangir Zülfüqarov, Nailə İsayeva və Dilarə Qulamova musiqi bəstələyib. Sözləri Sizə aid olan mahnıları Lütfiyar İmanov, Flora Kərimova, Brilliant Dadaşova, İlqar Muradov, Azər Zeynalov, Rəşidə Behbudova, Gülyanaq Məmmədova, Samir Cəfərov, Aygün Bəylər, Manana Caparidze, Elza Seyidcahan, Anar Şuşalı, Bəturə Hüseynova, Yusif Savalan, Məhsəti Cabbarova, Azərbaycan Dövlət Simfonik Orkestri və Xoru, “Savalan”, “Şeron”, “Kristal” qrupları, “Dünya” məktəbinin xoru və b. ifa edib. Arif Babayev, Alim Qasımov, Nəzakət Teymurova, Zabit Nəbizadə, Zakir Əliyev, Teyyub Aslanov kimi muğam ustaları, gənc xanəndə Abgül Mirzəliyev və b. xanəndələr, müğənnilər də Sizin yaradıcılığınıza müraciət edib.

Sizi 75 illik yubileyiniz, bütün elmi, pedaqoji, ictimai və ədəbi yaradıcılıq uğurlarınız münasibətilə bir daha təbrik edir, ən xoş arzularımı yetirirəm!”

Professor, akademik H.İsaxanlı komitə sədrinə “Xəzər”ə gəlişinə, xoş sözlərinə, təbrikinə görə təşəkkür edib.

Moderator.az İnformasiya Agentliyi tədbir haqqında geniş xəbər yayımlayıb. 

https://moderator.az/az/cemiyyet/613846/qenire-pasayevahamlet-isaxanlinitebrik-etdi/