2023-cü il martın 10-da Mingəçevir Dövlət Universitetində (MDU) “Bərpa olunan enerji ehtiyatlarından istifadəyə giriş” adlı kitabın təqdimatı keçirilib.
Bakı Ali Neft Məktəbinin rektoru Elmar Qasımov və Xəzər Universitetinin Coğrafiya və ətraf mühit departamentinin müdiri Rövşən Abbasovun müəllifliyi ilə yazılmış kitabın təqdimatında MDU-nun bir qrup professor-müəllim heyəti, tələbələr və magistrantlar iştirak ediblər.
Tədbirin açılışında kitabın mövzusunun aktuallığından danışan MDU-nun rektoru Şahin Bayramov son dövrdə ölkəmizdə bərpa olunan enerji ehtiyatlarından istifadəyə marağın artdığını və bu sahənin inkişafı ilə əlaqədar dövlət tərəfindən sistemli və kompleks tədbirlərin həyata keçirildiyini bildirib. Bu baxımdan kitabın mühüm elmi-nəzəri, tədris-metodiki və praktik əhəmiyyət kəsb etdiyini qeyd edən rektor dərsliyin mühəndis kadrların hazırlığını həyata keçirən MDU-da da tələbə və müəllimlər üçün faydalı olacağını vurğulayıb.
Sonra kitabın ayrı-ayrı bölmələri üzrə məruzələr dinlənilib. Diqqətə çatdırılıb ki, kitabın yazılmasında əsas məqsəd, müəlliflərin qeyd etdiyi kimi, oxucularda bərpa olunan enerji ehtiyatları, onlardan istifadə və bu sahədə müasir problemlər haqqında müfəssəl baza bilikləri yaratmaq olub. Müzakirələrdə müəlliflərin öz məqsədlərinə çatdığına əminlik ifadə edilib.
AZƏRTAC təqdimat haqqında xəbər yayımlayıb:
Copyright © Xəzər Universiteti, 2024
