2023-cü il martın 1-3-də İstanbul şəhərində yerləşən Lütfi Kırdar Beynəlxalq Konqres Mərkəzində (İCEC) EURİE-2023 Təhsil Sammitinin rəsmi açılışı oldu. Sammiti giriş sözü ilə Avrasiya Universitetlər Birliyinin prezidenti Dr. Mustafa Aydın açdı.

Sammitdə Keyfiyyətin Təminatı Mərkəzinin assistenti Kəmalə Mustafayeva və Beynəlxalq əlaqələr ofisinin koordinatoru Fatimə Vəliyeva iştirak edirdilər.

EURIE Sammiti universitet nümayəndələri və ali təhsil peşəkarları üçün görüş yeridir. Hər il baş tutan bu sammitə sərgi və konfranslar daxildir. Bu isə sammit iştirakçılarına bir-birini tanımağa, yeni tərəfdaşlıq imkanlarını artırmağa imkan verir.

3 gün davam edən EURIE-2023 Sammitinin proqramına panel sessiyaları, dəyirmi masalar, tanınmış təhsil nümayəndələri ilə görüşlər, eləcə də təhsil sərgisi daxil idi. Xəzər Universitetinin nümayəndə heyəti təhsil sərgisində və digər tədbirlərdə fəal iştirak etdilər.

Sərgidə Xəzər Universitetinin nümayəndələri universitetin stendində universitetin fəaliyyəti və əcnəbi tələbələrin qəbul prosesi, təqaüd imkanları haqqında məlumat verdilər. Bununla yanaşı, nümayəndələr universitetin tərəfdaşlarının stendlərində də oldular və yeni əməkdaşlıqlar üçün digər universitetlərlə də danışıqlar aparıldı.

Sammitin ikinci günündə Avrasiya Universitetlər Birliyinin prezidenti Dr. Mustafa Aydın Xəzər Universiteti, Naxçıvan Dövlət Universiteti, Azərbaycan Dillər Universiteti, Sumqayıt Dövlət Universiteti, Milli Aviasiya Akademiyası, Azərbaycan Memarlıq və İnşaat Universitetinin stendlərini özündə birləşdirən Azərbaycan stendinə gəldi. Görüşdə Dr. Mustafa Aydın universitetlərin öz nümayəndələri ilə Sammitdə təmsil olunmasının önəmini vurğuladı.