2023-cü il fevralın 24-də Bakıdakı “Fairmont Hotel”də British Council-ın “Creative Spark” layihəsinin yekunlarına həsr olunan görüş keçirilib.
Görüşdə Böyük Britaniyanın Azərbaycandakı səfiri Fergus Auld, British Council-ın ölkə üzrə direktoru Nərgiz Hacıyeva, Təhsildə Keyfiyyətin Təminatı Agentliyi İdarə Heyətinin sədri Ülkər Səttarova, ölkənin 7 universitetindən olan nümayəndələr iştirak etmişlər.
Konfransın açılışında British Council-ın ölkə üzrə direktoru Nərgiz Hacıyeva çıxış edərək, layihə haqqında qeydlərini bildirib. Sonra Böyük Britaniyanın Azərbaycandakı səfiri Fergus Auld çıxış edib.
Tərəfdaş universitetlər “Creative Spark” layihəsində tərəfdaşlıq və bu tərəfdaşlıq nəticəsində əldə olunan nailiyyətlər haqqında 5 illik hesabatı təqdim edərək, proqram çərçivəsində Azərbaycanda həyata keçirilən sahibkarlıq təhsili təşəbbüsünü və öz təcrübələrini, Böyük Britaniya və Azərbaycan arasında təhsil modelləri və yaradılmış tərəfdaşlığın gələcək inkişafını müzakirə ediblər. Qeyd edək ki, 5 illik layihə Xəzər Universitetində İnkişaf Mərkəzinin direktoru Raziyə İsayeva tərəfindən koordinasiya edilmiş və uğurla həyata keçirilmişdir.
Tədbirdə Xəzər Universitetini Beynəlxalq əlaqələr üzrə prorektor Vlad Vernygora, İnkişaf Mərkəzinin layihə meneceri Səbinə Quluyeva, rektorun köməkçisi Humay Hüseynova təmsil ediblər.
Tədbirin 2-ci hissəsində Xəzər Universitetinin nümayəndəsi Vlad Vernygora “Creative Spark” layihəsinin Xəzər Universitetində 5 il ərzində keçdiyi yoldan danışaraq, layihə çərçivəsində görülən işlər və qazanılan uğurlarla bağlı hesabatı təqdim edib. Sonra layihə müddətində Xəzər Universitetinin partnyoru olmuş London Middlesex Universitetinin əməkdaşları Dr George Dafoulas və Mahdi Aiash`ın məlumatları dinlənilib.
Tədbir layihənin davamlılığı və gələcək fəaliyyətlərlə əlaqədar müzakirə ilə başa çatıb.