Xəzər Universitetində Təbiət elmləri və mühəndislik fakültəsi və Həyat elmləri departamentinin təşkilatçılığı ilə 2023-cü il martın 1-də “1 Mart – Ümumdünya Mülki Müdafiə Günü”nə həsr edilmiş tədbir keçirildi. Tədbirdə universitetin müəllim və tələbələri iştirak edirdilər.
Xəzər Universitetinin əməkdaşı, MM qərargahının üzvü, ehtiyatda olan polkovnik-leytenant Mais Talışxanov tədbiri açıq elan etdi. O, tələbələrə mülki müdafiənin əhəmiyyəti, vəzifələri, əhalinin fövqəladə hallara qarşı necə hazır olmağın yolları haqqında ümumi məlumat verdi. Sonra tədbiri aparmaq üçün söz universitetin Humanitar, təhsil və sosial elmlər fakültəsinin tələbələri Əminə Mahmudova və Aytən Hüseynliyə verildi. Beynəlxalq Mülki Müdafiə Təşkilatının yaranma tarixi və inkişaf yolu, Azərbaycanın bu təşkilatda rolu barədə məlumatı tədbir iştrakçılarına həmin fakültənin tələbəsi Əsmər Qasımova təqdim etdi.
“1 Mart – Ümumdünya Mülki Müdafiə Günü” hər il bir mövzuya həsr edilir. Bu il isə tədbir universitetin 1-ci kurs tələbəsi Sumayə Ələkbərovanın hazırladığı “Risklərin qiymətləndirilməsində informasiya texnologiyalarının rolu” mövzusunda təqdimatı ilə davam etdi. Məruzəçi fəlakətlərin idarə edilməsi üçün risklərin qiymətləndirilməsi və xəritələrlə bağlı qaydalarının, təbii və texnogen xarakterli fəlakət risklərinin ümumi icmalı sənədinin, o cümlədən risklərin qiymətləndirilməsi metodlarında informasiya texnologiyalarının tətbiqi və CİS (Coğrafi İnformasiya Sistemi) haqqında danışdı.
Bu yaxınlarda qardaş Türkiyədə baş vermiş təbii fəlakət nəticəsində minlərlə insanın həyatını itirməsi, bina və qurğuların dağılması bir daha zəlzələ mövzusunu gündəmə gətirmişdir. Tədbirdə Humanitar, təhsil və sosial elmlər fakültəsinin 3-cü kurs tələbəsi Aygün İsmayılova Valeh Qocanın “Zəlzələ” və Bəxtiyar Vahabzadənin “Deprem” şeirlərini söylədi. “Geofiziki hadisə olan zəlzələlərin insanlara və obyektlərə təsiri “ mövzusunda tələbə Röya İsmayılova təqdimatla çıxış etdi. Təqdimatda zəlzələlərin yaranma səbəbləri, obyektlərə, insanlara və cəmiyyətdə yaratdığı fəsadlar haqqında danışıldı. Həmçinin, qardaş Türkiyə respublikasında baş vermiş zəlzələnin və onun nəticələrinin aradan qaldırılmasında Azərbaycan respublikasının FHN əməkdaşlarının axtarış-xilasetmə işlərində göstərdiyi fədakarlığı və humanitar yardım haqqında tədbir iştirakçılarına geniş məlumat verdi. Məruzə, tələbə Ayna Seyidova tərəfindən hazırlanmış “FH üçün nəzərdə tutulmuş çanta”nın təqdimatı ilə bitdi.
Tədbirin praktiki hissəsində FH zamanı xilasetmə işlərinə aid olan, insanlara ilk yardım zamanı süni tənəffüsün verilməsi və ürəyin qapalı masajının qaydaları tələbə Nərgiz Hadıyeva tərəfindən nümayiş olundu. Bundan sonra tədbir iştirakçılarına ilk yardım çantasının istifadəsi, qanaxmalar və sınıqlar zamanı ilk yardım qaydaları tələbələr Dəniz Aslanlı və Aytac Lələxanova tərəfindən təqdim edildi.
Zədələnmə ocaqlarında xəsarət almış insanların yerdəyişməsi və daşınması təhlükəsizlik baxımından çox önəmli olduğu üçün “Zərərçəkənlərin daşınması üsullarını” tədbir iştirakçılarına Humanitar, təhsil və sosial elmlər fakultəsinin 1-ci kurs tələbələri Mirməhəmməd Cabbarov, Şəhriyar Rüstəmov, Amil Ağasıyev, Murad İsmayilzadə və Gündüz Məmmədli izah edib, praktiki göstərdilər.
Tədbirdə çıxış edən Xəzər Universitetinin Fövqəladə hallar komissiyasının üzvü, Coğrafiya və ətraf mühit departamentinin müdiri, coğrafiya üzrə fəlsəfə doktoru Rövşən Abbasov “Dünyada baş verən təbii fəlakətlərin proqnozlaşdırılması və təhlili haqqında ” muasir elmi baxışlar barədə məlumat verdi. Universitetinin MM qərargahının üzvü, inzibati şöbənin koordinatoru İslam Hüseynov isə insanların təhlükəsizliyinin təmin olunması və fövqəladə hallar zamanı əhalinin mühafizəsinin xüsusi əhəmiyyəti haqqında məlumatlatla çıxış etdi. Bununla da tədbir yekunlaşdı.