2023-cü il fevralın 20-də Xəzər Universitetinin İqtisadiyyat və menecment fakültəsinin nəzdində yaradılmış “İqtisadçı” Tələbə İnkişaf Klubunun ilk tədbiri keçirilmişdir. Tədbirdə çıxış edən klubun sədri, İqtisadiyyat və menecment departamentinin müəllimi Həsən Rəhimli tələbələrin asudə vaxtının səmərəli təşkili və şəxsi inkişafları üçün yaradılmış imkanlara görə İqtidiyyat və menecment fakültəsinə, dekan Dr. Ceyhun Məmmədova öz təşəkkürünü bildirdi. O, klubun yaradılmasının səbəblərindən danışaraq qeyd etdi ki, klubun əsas məqsədi elmi və idarəetmə bacarıqlara malik tələbələri bir araya gətirərək onların həm bir-birilə, həm professor-müəllim heyəti ilə, həm də işgüzar sferanın nümayəndələri ilə əməkdaşlığını təşkil etmək, xüsusən, tələbələrdə iqtisadi elmi tədqiqat vərdişlərinin, analitik bacarıqların, tənqidi təfəkkürün formalaşmasına, həm də iqtisadiyyat ilə əlaqəli digər sosial elmlər üzrə zəruri biliklərin artırılmasına yardımın göstərilməsindən ibarətdir.

Klubun ilk tədbirinə qonaq mühazirəçi qismində dəvət edilmiş "İqtisadi Təhlil İnstitutu"nun rəhbəri, iqtisadçı ekspert Məmməd Talıblı "İqtisadçı obrazı" mövzusunda çıxış etdi. Məmməd Talıblı müasir dövrdə iqtisadçı peşəsinin əhəmiyyətindən, iqtisadçı olmağın məsuliyyətindən, iqtisadçının əsas peşəkar xüsusiyyətlərindən, iqtisadçı olmaq üçün zəruri olan bilik və bacarıqlardan danışaraq ideal iqtisadçı obrazının təsvirini verməyə çalışdı. Həmçinin, iqtisadçı ekspert görkəmli iqtisadçı alimlərin fikirlərinə istinadla qeyd etdi ki, peşəkar iqtisadçı olmaq üçün iqtisad elmləri sahəsinin konkret bir istiqaməti üzrə dar ixtisaslaşma ilə bərabər, iqtisadçının iqtisadi proseslərin dərin qatlarını anlamaq üçün fəlsəfi, sosioloji, siyasi, psixoloji, tarixi və riyazi bilikləri mürəkkəb kombinasiyada birləşdirməyi bacarması da çox vacibdir. İnteraktiv üsulla keçirilmiş görüşdə iqtisadçı peşəsinə müxtəlif sosial qrupların fərqli baxışları müzakirə edildi. Klub üzvü olan tələbələr də mövzu ilə bağlı öz fikir və mülahizələrini bildirdilər, həmçinin ekspertə suallarını verdilər.

Qeyd edək ki, “İqtisadçı” Tələbə İnkişaf Klubunun hər ay müxtəlif formatda (ustad dərsi, təlim, debat, kitab müzakirəsi, disput, yarışma) tədbirlərin keçirilməsi planlaşdırılır.