2023-cü il fevralın 7-8-də Erasmus+ ATPG-2023 Proqramı çərçivəsində maliyyələşməyə seçilmiş layihələrin koordinatorları üçün onlayn görüş keçirilmişdir. Tədbirdə “Azərbaycanda İnstitusional Repozitorlar Şəbəkəsi” DİRNA layihəsinin koordinatoru kimi Xəzər Universiteti İnkişaf Ofisinin direktoru Raziyə İsayeva iştirak etmişdir.
İki gün davam edən görüş proqramla bağlı məsələləri müzakirə etmək və fikir mübadiləsi aparmaq üçün 150 qurumun nümayəndələrinin iştirakı ilə keçib.
Görüşün ilk günündə EACEA.A.4 Beynəlxalq Potensialın Gücləndirilməsi bölməsinin rəhbəri Barbara Gessler və Erasmus+ və Aİ Yardım Könüllüləri Direktoru vəzifəsini icra edən və Departamentin rəhbəri Sofi Beernaerts “Ali Təhsildə Potensialın Gücləndirilməsi: cari və gələcək perspektivlər” mövzusunda çıxış etdilər.
Sessiyanın növbəti günü ATPG (Ali Təhsildə Potensialın Gücləndirilməsi) layihəsinin icrası, monitorinqi və idarə edilməsi ilə bağlı əsas məqamlara həsr olunub. Raziyə İsayeva Açıq Giriş İnstitusional Repozitoriyalar Şəbəkəsinin yaradılması yolu ilə Azərbaycanın səkkiz aparıcı ali təhsil müəssisəsinə diqqət yetirməklə tədqiqat nəticələrinin idarə edilməsi kontekstində potensialın artırılması məqsədi daşıyan “Azərbaycanda İnstitusional Repozitorlar Şəbəkəsi” DİRNA layihəsi haqqında təqdimatla çıxış etdi. Layihə Azərbaycanın səkkiz ali təhsil müəssisəsi və üç Avropa ali təhsil qurumundan ibarətdir.
Görüş sual-cavab sessiyası ilə başa çatıb.