2023-cü ul yanvarın 24-də Gənclər və İdman nazirliyi Kırşehir İl müdirliyinin təşkilatçılığı ilə Kırşehir Neşet Ertaş Mədəniyyət Mərkəzində ictimaiyyətin iştirakı ilə ədəbi-bədiitədbir keçirildi.

“Türkiyə-Azərbaycan Gənclik Mübadilə Proqramı” çərçivəsində həyata keçirilən tədbirin bütün iştirakçıları salonu Azərbaycan və Türkiye bayraqları ilə bəzəmişdilər. Aparıcı Çilem Dellal açılış üçün sözü Kırşehir Gənclər və İdman İl müdiri Numan Nafiz Şahinə verdi. N.Şahin Kırşehir İl valisini və digər rəsmiləri, Bakıdan gələn Xəzər Universitetinin nümayəndə heyətini və salona toplaşanları salamlayaraq, Azərbaycan-Türkiyə dostluq əlaqələrinin genişləndirilməsindən böyük qürurla danışdı.

Sonra söz Xəzər Universitetinin nümayəndə heyətinin rəhbəri Əlövsət Əmirbəyliyə verildi. O, yüksək qonaqpərvərlikdən dolayı Gənclər və İdman Nazirliyinə, İl rəhbərliyinə minnətdarlığını bildirdi.

Ədəbi-bədii tədbirdə Azərbaycanın və Türkiyənin xalq mahnıları səsləndirildi. Gənclər və İdman Nazirliyinin rəqs qruplarının ifasında rəngarəng rəqslər ifa edildi.

Sonda Kırşehir valisi H.Mete Xudayar və digər rayon rəsmiləri Azərbaycandan gələn, proqramda aktiv iştirak edən Xəzər Universitetinin nümayəndə heyətinin rəhbərliyinə və tələbələrə sertifikat təqdim etdilər. Xatirə şəkilləri çəkildi.