Tarix və arxeologiya departamentinin müdiri Telman Nüsrətoğlu 2023-cü il yanvarın 27-28-də Türkiyənin TRT Haber, CNN Türk, BBN Türk, TV Net televizyalarındakı çıxışlarında Azərbaycanın Tehrandakı səfirliyinə mənfur terror hücumunu, Azərbaycan-İran münasibətlərində yaşanan gərginliyin səbəblərini geniş şəkildə şərh etmişdir.
Telman Nüsrətoğlu çıxışlarında xüsusilə 44 günlük Qarabağ müharibəsində Azərbaycanın parlaq zəfərindən sonra İranın Cənubi Qafqaz siyasətində erməni meyilli, Azərbaycan əleyhinə xəttin qabarıq görünməyə başladığını, bu siyasətin İranın öz demoqrafik durumuyla da ziddiyyət təşkil etdiyini və rəsmi Tehranın Zəngəzur dəhlizinin açılması ilə də razılaşmadığını söyləyərək, bu siyasətlə normal qonşuluq münasibətlərinin və əlaqələrin davam etdirilməsinin imkansız olduğunu nəzərə çatdırmışdır.