Türkiye Cumhuriyyəti Gənclər və İdman nazirliyinin Kırşehir şəhərində yerləşən Ahu Evran Tələbə Şəhərciyində möhtəşəm bir gün yaşandı. Burada 105 il bundan öncə Azərbaycanın paytaxtı Bakı şəhərini işğaldan azad edən Müzəffər Qafqaz İslam Ordusunda Kırşehirdən olan 34 nəfər şəhidin şərəfinə əbədi xatirə lövhəsinin açılışı oldu.

Açılışda Gənclər və idman nazirliyi və ictimaiyyətin nümayəndələri iştirak etdilər. 34 nəfər Kırşehirli şəhidin şərəfinə “Türkiyə-Azərbaycan Gənclik Mübadiləsi” proqramı çərçivəsində mərmərdən əbədi xatirə lövhəsi və şəhidlərin adları yazılmış lövhələr yerləşdirildi.

Açılış mərasimini Türkiye Cumhuriyyəti Gənclər və İdman nazirliyi Kırşehir İl müdiri Numan Nafiz Şahin açaraq, proqramın Azərbaycandan olan nümayəndə heyətini və açılışda iştirak edən bütün qonaqları salamlayaraq, Müzəffər Qafqaz İslam ordusunun şəhid əsgərlərinin şərəfinə inşa edilmiş xatirə lövhəsinin Türkiyə və Azərbaycan dostluğunun əbədi rəmzi olduğunu bildirdi. N.Şahin çıxışında qeyd etdi ki, bir ay bundan öncə Xəzər Universitetinin qonağı kimi Bakıda olarkən Qafqaz İslam ordusunun şərəfinə Dağüstü parkda yaradılmış Bakı Türk şəhidliyində əbədi uyuyan yüzlərlə şəhidlərin arasında 34 nəfər Kırşehirlinin də adlarını da gördük. Bundan sonra qərara aldıq ki, 34 nəfər Kırşehirlinin şərəfinə Kırşehirdə də xatirə lövhəsi yaradılsın. Bu gün həmin xatirə lövhəsinin açılışıdır və bu xatirə lövhəsinin “Türkiyə-Azərbaycan Gənclik Mübadiləsi” proqramı çərçivəsində Bakıdan gələn Xəzər Universitetinin nümayəndə heyətinin üzvləri ilə birlikdə açılışını etməkdən qürur duyuruq.

Xəzər Universitetinin tələbələri tərəfindən hər şəhidin adına bir ağac və şəhidin adı yazılmış lövhə bərkidildi. Tələbələr ağacları əkdilər və onları suladılar. Xatirə lövhəsinin açılışında ilk ağacı II Qarabağ savaşının qazisi, Xəzər Universiteti İqtisadiyyat və menecment fakültəsinin tələbəsi, Qazi Ziya Əlizadə əkdi.

Şəhidlərin ruhuna Qurani-Kərim tilafəti oxundu.

Xəzər Universitetinin nümayəndə heyətinin rəhbəri Əlövsət Əmirbəyli çıxış edərək bildirdi ki,105 il bundan öncə Bakını işğaldan azad edən Müzəffər Qafqaz İslam ordusunun Kırşehirdən olan 34 nəfər şəhidini onların doğulduğu məmləkətdə yad etmək bizlər üçün böyük şərəfdir. 105 il bundan öncə onlar Bakını işğaldan azad etdilər, bugün isə onların şəhid olaraq azad etdikləri ölkənin övladları onların ruhlarını Kırşehirdə yad edirlər. Müzəffər Qafqaz İslam ordusu Bakını işğaldan azad edərək, onu Azərbaycanın əbədi paytaxtına çevirdi. Azərbaycan vətəndaşları olaraq bugün onları öz vətənlərində böyük qurur hissi ilə yad edirik.

Ə.Əmirbəyli xatirə lövhəsinin hazırlanmasında əməyi keçən Türkiyə Cümhuriyyəti Gənclər və İdman Nazirliyinə, Kırşehir valiliyinə, Kırşehir İl başqanlığına və şəxsən Gənclər və İdman Nazirliyi Kırşehir İl müdiri Numan Nafiz Şahinə, onun rəhbərlik etdiyi idarənin əməkdaşlarına və bu işdə əməyi keçən hər kəsə Xəzər Universitetinin rəhbərliyi, müəllim-professor heyəti və tələbələri adından dərin təşəkkürünü bildirdi.

Əbədi xatirə lövhəsinin və şəhid adları yazılan lövhələrin önündə xatirə şəkilləri çəkildi.