Türkiyə Respublikası Gənclər və İdman Nazirliyinin “Türkiyə-Azərbaycan Gənclər Mübadiləsi” proqramı çərçivəsində 2023-cü il yanvarın 22-də Xəzər Universitetinin tələbələrdən ibarət nümayəndə heyətinin Türkiyəyə səfəri başladı.

Nümayəndə heyətini Esenboğa hava limanında Gənclər və İdman Nazirliyi Kırşehir İl rəhbərliyi qarşıladı. Proqrama uyğun olaraq axşam ziyafəti verildi. Ziyafətdə Anayasa Məhkəməsi başqan vəkili Kadir Özkaya, Kırşehir İl müdiri Numan Nafiz Şahin, Layihə koordinatoru Hakan Avşar, Qazi Universitetinin professoru Camal Yılmaz iştirak etdilər. Onlar Xəzər Universitetinin nümayəndə heyətini salamlayaraq, qarşıdakı səfərdə uğurlar arzuladılar və nümaəndə heyətinin üzvlərinə Türkiyə-Azərbaycan bayraqlarının simgəsi olan geyimləri hədiyyə etdilər.

***

Türkiyə Gənclər və İdman Nazirliyində görüş

2023-cü il yanvarın 23-də Türkiyə Cümhuriyyəti Gənclər və İdman nazirliyinin Xarici əlaqələr idarəsinin Baş müdir yardımcısı Enes Efendioğlu Xəzər Universitetinin nümayəndə heyətini qəbul etdi. E.Efendioğlu Xəzər Universiteti ilə həyata keçirilən bu mübadilə proqramından məmnun olduğunu və bundan sonra da Xəzər Universiteti ilə əlaqələrinin inkişaf etdirilməsinin vacibliyini vurğuladı.

Gənclər və İdman Nazirliyi Kırşehir il müdiri Numan Nafiz Şahin layihənin gedişi haqqında nazirliyin rəhbərliyinə və toplantı iştirakçılarına məlumat verdi. Xəzər Universiteti nümayəndə heyətinin rəhbəri, universitetin İctimai əlaqələr və media üzrə direktoru Əlövsət Əmirbəyli də Xəzər Universiteti haqqında iştirakçıları məlumatlandırdı və Xəzər Universitetinin Şuşa plaketini, Azərbaycanın Milli Brendi Azərçayın hədiyyəsini təqdim etdi. Gənclər və İdman Nazirliyinin “Gənclik radiosu”nda görüş davam etdirildi.

***

Cümhurbaşkanlığı Külliyəsini (Beştepe yerleşkesi) və Türkiyə Cümhuriyyətinin qurucusu Ulu Öndər Mustafa Kamal Atatürk`ün anıt məzarını ziyarət

2023-cü il yanvarın 23-də Xəzər Universitetinin nümayəndə heyəti Cümhurbaşkanlığı Külliyəsini (Beştepe yerleşkesi) ziyarət etdi. Layihə koordinatoru Hakan Avşar Külliyə haqqında gənclərə məlumat verdi. Proqrama uyğun olaraq nümayəndə heyəti Türkiyə Cümhuriyytinin qurucusu Ulu Öndər Mustafa Kamal Atatürkün anıt məzarını ziyarət etdi.

***

Türkiyə Böyük Millət Məclisində

2023-cü il yanvarın 23-də Xəzər Universiteti nümayəndə heyətinin Türkiyə Böyük Millət Məclisində millət vəkili, Türkiyə-Azərbaycan Parlamentlərarası Dostluq qrupunun rəhbrəri Şamil Ayrım və Kırşehirli millət vəkili Hacı Turanla görüşü oldu. Millət vəkilləri Xəzər Universitetinin

nümayəndə heyətini səmimi salamlayaraq, onlarla yaxından tanış oldular və bu görüşdən məmnun olduqlarını bildirdilər. Onlar Azərbaycan-Türkiyə dostluq əlaqələri haqqında tələbələrə məlumat verdilər.

Türkiyə Cümhuriyyəti Gənçlik və İdman Nazirliyi Kırşehir il müdiri Numan Nafiz Şahin Xəzər Universiteti ilə həyata keçirilən Mübadilə proqramı haqqında Millət vəkillərinə geniş məlumat verdi.

Xəzər Universitetinin İctimai əlaqələr və media üzrə direktoru, qrupun rəhbəri Əlövsət Əmirbəyli universitetin təsisçisi, Direktorlar və Qəyyumlar Şurasının sədri professor, akademik Hamlet İsaxanlının və universitetin rektoru dosent İradə Xəlilovanın salamlarını çatdırdı və belə beynəlxalq mübadilə proqramlarının gənclər üçün böyük əhəmiyyəti olduğunu vurğuladı. O, Hamlet İsaxanlının “Mənim Qarabağım və ya Qarabağ düyünü” kitabını, Xəzər Universitetinin Şuşa plaketini və Azərbaycanın Milli Brendi Azərçayın hədiyyəsini millət vəkili Şamil Ayrıma təqdim etdi.

Millət Vəkilləri Şamil Ayrım və Hacı Turan Xəzər Universitetinin tələbələrini Ankarada qonaq etməkdən məmnun olduqlarını bildirdilər. Millət vəkili Şamil Ayrım nümayəndə heyətinin şərəfinə ziyafət verdi.

***

Külliyədə Cümhurbaşkanlığı protokol xidmətinin rəhbəri ilə görüş

Xəzər Universitetinin nümayəndə heyətinin rəhbəri Əlövsət Əmirbəyli və Türkiyə Gənclər və İdman Nazirliyi Kırşehir İl müdürü Numan Hafiz Şahin 2023-cü il yanvarın 23-də Külliyədə Cümhurbaşkanlığı protokol xidmətinin rəhbəri, Türkiyənin Azərbaycandakı sabiq səfiri Erkan Özoral`ı ziyarət etdilər. Ona Xəzər Universitetinin təsisçisi, Direktorlar və Qəyyumlar Şurasının sədri professor, alademik Hamlet İsaxanlının yeni nəşr olunmuş “Mənim Qarabağım və ya Qarabağ Düyünü“ kitabını, universitetin Şuşa plaketini və Azərbaycanın milli brendi olan Azərçayın hədiyyəsini təqdim etdilər.

***

Ankarada Məhəmməd Əmin Rəsulzadənin məzarı ziyarət edildi

Türkiyə Cümhuriyyəti Gənclər və İdman nazirliyinin Türkiyə-Azərbaycan Gənclik Mübadiləsi Proqramının protokoluna uyğun olaraq Xəzər Universitetinin nümayəndə heyəti və nazirliyin əməkdaşları 2023-cü il yanvarın 23-də Cəbəci əsri məzarlığında yerləşən Azərbaycan Xalq Cümhuriyyətinin qurucusu Məhəmməd Əmin Rəsulzadənin məzarını ziyarət edib, üzərinə qərənfillər düzdülər.

Qrupun rəhbəri Əlövsət Əmirbəyli Məhəmməd Əmin Rəsulzadənin həyatı və yaradıcılığı haqqında tələbələrə məlumat verdi.

Həmin gün axşam Kırşehir millət vəkili Mustafa Kendirli Türkiyə Böyük Millət Məclisinin müsafir salonunda Xəzər Universiteti nümayəndə heyətinin şərəfinə ziyafət verdi.

Sonra nümayəndə heyəti proqrama uyğun olaraq Ankaradan Kırşehirə yola düşdü. Proqrama uyğun olaraq növbəti günlərdə Kırşehir, Nevşehir və Kapadokyada görüşlər davam etdiriləcək.

Nümayəndə heyətinin Media Qrupu tərəfindən görüşlər haqqında məlumat ictimaiyyətə çatdırılacaq.