2023-cü il yanvarın 8-də Xəzər Universitetinin Mərmər salonunda Xəzər Universiteti və Edu Company Təhsil Şirkətinin birgə təşkilatçılığı ilə Ümummilli Lider Heydər Əliyevin 100-cü ildönümünə həsr edilmiş bilik yarışı keçirilmişdir. Əvvəlcə dövlət himni səsləndirilmiş və Ulu Öndərin həyat yoluna aid geniş videoçarx nümayiş etdirilmişdir.
Tədbiri giriş sözü ilə universitetin rektoru dosent İradə Xəlilova açmışdır. Rektor Ümummilli Lider Heydər Əliyevin həyatına nəzər salmış, onun elm, təhsil və sənətə verdiyi dəyərin əhəmiyyətini vurğulamışdır.
Yarışmanın bədii hissəsində Edu Company Şirkətinin dinləyiciləri milli musiqilər ifa etmişlər.
Bilik yarışında “Suqovuşan”, “Ağdam”, “Hadrut”, “Zəngilan”, “Şuşa” və “Laçın” komandaları yarışmışdır. Komandalara cəmi 24 sual verilmişdir. “Şuşa”, “Laçın” və “Hadrut” komandaları ardıcıllıqla 1-ci, 2-ci və 3-cü yerlərin qalibləri olmuşlar. Qaliblərə mükafatı Edu Company Təhsil Şirkətinin baş direktoru Samir Əzizov, şirkətin idarə heyətinin üzvləri, Xəzər Universitetinin rektoru İradə Xəlilova və universitetin İctimai əlaqələr və Media üzrə direktoru Əlövsət Əmirbəyli təqdim etmişdir.
Tədbirdə Samir Əzizov yekun söz söyləmişdir.