Xəzər Universitetinin təsisçisi, Direktorlar və Qəyyumlar Şurasının sədri professor, akademik Hamlet İsaxanlıya

Hörmətli cənab Sədr,

Bu ilin mart ayında Azərbaycan Respublikasının Prezidenti İlham Əliyev Azərbaycan və SSRİ-nin Xalq artisti, Dövlət mükafatları laureatı Fikrət Əmirovun 100 illiyinin dövlət səviyyəsində qeyd edilməsi ilə bağlı sərəncam imzalayıb.

Bu sərəncamla bağlı ilin əvvəlindən etibarən, demək olar ki, yubiley respublikamızın bütün güşələrində və xarici ölkələrdə silsilə tədbirlərlə qeyd edilir.

Atamın 100 illik yubileyi ilə əlaqədar dekabrın 19-da Xəzər Universitetinin Fikrət Əmirov Konfrans-Konsert Mərkəzində ölkənin mədəniyyət xadimləri və ziyalıların iştirakı ilə kecirilən tədbir özünə məxsus yer tutur.

Kampusun foyesində universitetin Dekorativ və Tətbiqi Sənət Muzeyinin direktoru, tanınmış xalçaçı rəssam Afaq Kərimovanın rəhbərliyi ilə bəstəkarın həyat və fəaliyyəti haqqında tərtib edilmiş geniş sərgi nümayiş olundu. Həmçinin, tədbirdə heykəltəraş Əliağa Mailovun “Fikrət Əmirov” büstü nümayiş etdirildi.

Siz tədbiri açaraq öz geniş və əhatəli çıxışınızda bəstəkarın yaradıcılığının əsas mərhələləri haqqında ətraflı məlumat verdiniz.

Tədbir zəngin musiqi proqramı ilə davam etdirildi. Konsert Universitetin Musiqi və incəsənət departamentinin müdiri, əməkdar müəllim, tanınmış pianoçu Zülfiyyə Sadıqovanın bədii rəhbəri olduğu universitet Kamera orkestrinin ifası, Orxan Həşimovun dirijorluğu ilə keçdi.

Atam Fikrət Əmirovun 100 illik yubileyi çərçivəsində onun unudulmaz xatirəsinin yad edilməsinə yönəldilmiş möhtəşəm tədbirin uğur və ləyaqətlə keçirilməsində Sizə və Universitetin əməkdaşlarına dərin minnətdarlığımı bildirirəm.

Hörmətlə,
Sevil Əmirova