İqtisadiyyat və menecment fakültəsi Maliyyə ixtisasının 4-cü kurs tələbələri Şəfəq Qasımova və Xəqan Nurullayev UniLab layihəsi çərçivəsində xarici səfərdə olublar. Təəssüratlarını oxucularla bölüşürlər.

Şəfəq Qasımova: 

- Universitetimizin bir qrup əməkdaşı ilə İspaniyada Barselona Menecment Məktəbində (Barcelona School of Management) oldum. Məni həm təhsil qaydaları, həm də turistik yerlər maraqlandırırdı. Unilab layihəsinin ümumi komandası ilə fikirlərimizi bölüşdük və maraqlı söhbət etdik. Müxtəlif millətlərdən olan tələbələrin eyni mövzu ilə bağlı müxtəlif fikirlərini bir yerdə eşitmək çox maraqlı oldu.

Barselona Menecment Məktəbinin müxtəlif korpuslarında olduq. Tələbələr üçün gözəl şərait yaradılmışdı. Müasir dizaynlı böyük tamaşaçı zalları var idi. Kitabxanada diqqətimi cəlb edən kitab fondunun zənginliyi və bütün oxu zallarının tələbələrlə dolu olması idi.

Universiteti yenicə bitirmiş tələbələrin müasir bazarın tələblərinə uyğunlaşması üçün onlar təhsil müddətində müəyyən bacarıqlara, həm də ünsiyyətqabiliyyətinə yiyələnməlidirlər. Karyera və inkişaf mərkəzləri iş bazarı ilə tələbələr arasında körpü rolunu oynayır. Bu layihə çərçivəsində tələbələrin əmək bazarına çıxış imkanlarının müəyyənləşdirilməsində karyera mərkəzlərinin rolunu bir daha dərk etdik.

Unilab layihəsinin təşkil etdiyi silsilə mühazirələrdə ölkəmizin komandası ilə iştirak etdik. Bu mühazirələrin sonunda qrup işi və fikir mübadiləsi bizim üçün çox faydalı oldu.

Səfər zamanı tarixi-memarlıq abidələrində olduq, İspaniyanın milli mətbəxinin təamlarından daddıq.

***

Xəqan Nurullayev:

- Bu, iştirak etdiyim ilk Erasmus+ layihəsi idi. Xəzər Universitetinin bir qrup əməkdaşı ilə Avstriyanın IMC Krems Tətbiqi Elmlər Universitetində keçirdiyimiz 3 günü əla dəyərləndirərdim. Çünki yaxşı təcrübə əldə etdik, yaxşı vaxt keçirdik. Krems kiçik bir şəhər olsa da, eyni zamanda müasirliyi və tarixi memarlığı özündə birləşdirir. Buna sübut olaraq, müasir tikililəri, elektromobillər üçün enerji doldurma stansiyalarını və tarixi binaları nümunə göstərə bilərik.

Layihə zamanı universitet şəhərciyi və onun şəraiti ilə tanış olduq. Universitet tələbələr üçün gözəl şərait yaratmışdır, rəqəmsal dünya ilə tanış olmağa imkan verən çox bahalı VR texnologiyasına malikdir. Bizim də VR texnologiyasını təcrübədən keçirmək şansımız oldu və bu heyranedici idi.

Universitetində tədris olunan ixtisaslardan birinin də "Şərab biznesi" olduğunu eşidəndə, bu bizə çox maraqlı gəldi. Sonra öyrəndik ki, iqlim burada üzüm bağlarının salınmasına çox əlverişli şərait yaradır. Əhali dağ yamaclarında pilləkənə bənzər terras quraraq, üzüm bağları salır.

Vurğulamaq istərdim ki, görüş zamanı universitetin Karyera mərkəzi məzunlarının işlə təmin olunması ilə bağlı statistik məlumatları açıqlayanda, bu rəqəm təxminən 100%-ə bərabər idi. Ümid edirəm ki, Xəzər Universiteti də öz Karyera mərkəzinin səyləri və araşdırmaları ilə eyni nəticəni əldə edəcək.

Səfər zamanı müəyyən təcrübə qazandıq, unudulmaz günlər keçirdik.