2022-ci il dekabrın 17-də Xəzər Universiteti və Azərbaycan Dövlət Neft və Sənaye Universitetinin (ADNSU) təşkilatçılığı ilə Erasmus+ UniLab layihəsi (610245-EPP-1-2019-1-BE-EPPKA2-CBHE-JP) çərçivəsində ADNSU-da UniLab Milli Konfransı keçirilib.

Konfransda Xəzər Universitenin Karyera Mərkəzinin koordinatoru Elnurə Əhmədzadə, İnkişaf Mərkəzinin layihə meneceri Jalə Rzayeva və layihə assistenti Jalə Əlizadə iştirak ediblər. Konfransın açılış bölməsində Jalə Rzayeva və Elnurə Əhmədzadə tərəfindən UniLab layihəsi çərçivəsində Xəzər Universitetində görülən işlər haqqında yekun hesabat təqdim olunub. Konfrans ADNSU-nun Beynəlxalq şöbəsinin Beynəlxalq layihələr sektorunun müdiri Leyla Nağıyevanın moderatorluğu ilə keçib.

Konfransda “Tələbələrin və işəgötürənlərin vakansiyalara və təcrübə proqramlarına müraciət edərkən qarşılaşdıqları problemlər və onların həlli istiqamətində atılan addımlar” və “Gənclərin iş həyatında yeri və rolu: sənaye və universitet əməkdaşlığı” mövzularında panel müzakirələri aparılıb.

Müzakirələrdə Dövlət Məşğulluq Agentliyinin əməkdaşı Əli Qurbanlı, “Karmasis Azerbaijan” şirkətinin baş direktoru Berna Baysal, “Zəfəroğlu” şirkətinin təsisçisi Zəfər Məmmədov, Azərbaycan İnformasiya və Kommunikasiya Texnologiyaları Sənayesi Assosiasiyası (AİKTSA) İdarə Heyətinin sədri Elvin Abbasov, “Bakı Tekstil Fabriki” MMC-nin icraçı direktoru Elçin Babayev, VITAM şirkətinin direktoru Tehran Əliyev, ATEF şirkətinin texniki direktoru Nadir Kərimov və Dadaşlı Biznes Qrupunun direktoru Elxan Sultanlı iştirak ediblər.

Konfrans tələbələrin də fəal iştirakı ilə interaktiv formada keçirilib.