2022-ci il dekabrın 14-də türkiyəli qonaqlar Xəzər Universitetinin “Dünya” məktəbində oldular. Xəzər Universiteti ictimai əlaqələr və media üzrə direktor Əlövsət Əmirbəyli “Türkiyə-Azərbaycan Gənclik Mübadiləsi” proqramı çərçivəsində Xəzər Universitetinə gəlmiş kırşehirli qonaqları təqdim etdi.

“Dünya” məktəbinin direktoru Nazpəri Bayramova qonaqlara məktəb haqqında məlumat verdi. “Dünya” məktəbi haqqında film nümayiş etdirildi. Qonaqlar Nailəxanım muzeyində “Dünya” məktəbinin qurucusu Nailəxanım İsayevanın həyat və fəaliyyətini, işgüzar və yaradıcılıq əlaqələrini dolğun əks etdirən fotostendlər, eksponatlar və şəxsi əşyaları, sonra isə məktəbin kitabxanası ilə tanış oldular.

Türkiyə Cümhuriyyəti Gənclər və İdman Nazirliyi Kırşehir rayon rəhbəri Numan Şahin, şöbə müdiri Aslan Uçar, layihə rəhbəri Hakan Avşar və könüllülər çıxış edərək, səfərdən məmnun olduqlarını bildirdilər. Qonaqların şərəfinə ziyafət verildi.

Həmin gün qonaqlar üçün “Atəşgah məbədi” Dövlət Tarix-Memarlıq Qoruğu və “Yanardağ” Dövlət Tarix-Mədəniyyət və Təbiət Qoruğuna ekskursiya təşkil edildi.

Dekabrın 15-də qonaqlar “Şəhidlər Xiyabanı“, “Bakı Türk şəhidliyi“, “Qız Qalası“, “Dağüstü Park“, “Alov qüllələri“, “Bakı bulvarı“ və “Seyid Yəhya Bakuvi türbəsi”ni ziyarət etdilər, “İçərişəhər“lə tanış oldular.