İqtisadiyyat və menecment fakültəsi 2022-ci il dekabrın 1-də “Cənubi Qafqazda və Norveçdə akademiya və iş yerlərində mədəniyyətlərarası görüşlər” (CPEA-LT-2017/10016, 2018-2021) mövzusunda seminar təşkil edib.

Tədbir layihənin nəticələrini elan etməklə yanaşı, həm də Xəzər Universiteti və Oslo Metropolitan Universiteti arasındakı əməkdaşlığın gələcək perspektivlərini müzakirə etmək məqsədilə təşkil olunmuşdu.

Əvvəlcə Xəzər Universitetinin rektoru dosent İradə Xəlilova Oslo Metropolitan Universitetinin nümayəndə heyətini - professor Arnfinn Muruvik Vonen, baş məsləhətçi Mikhail Kharakoz, tədqiqatçı Dr. Jørn Holm-Hansen və baş məsləhətçi Kristin Bugge`ni qəbul edib. Tədris işləri üzrə prorektor, professor Məhəmməd Nuriyev, beynəlxalq əlaqələr üzrə prorektor Vlad Vernygora, İqtisadiyyat və menecment fakültəsinin dekanı Dr. Ceyhun Məmmədov və Keyfiyyətin Təminatı Mərkəzinin rəhbəri Lyudmila Sotova da görüşdə olublar.

Xəzər Universitetinin rəhbərliyi ilə görüşdən sonra qonaqlar İqtisadiyyat və menecment departamentinin koordinatoru Dr. Maral Camalovanın moderatorluğu ilə layihənin yayılması ilə bağlı tədbirdə iştirak ediblər. Dr. Ceyhun Məmmədov tədbir iştirakçılarını salamlayaraq, Oslo Metropolitan Universitetinin nümayəndə heyətini iştirakçılara təqdim edib. Sonra Oslo Metropolitan Universitetinin nümayəndələri ilə birlikdə Xəzər Universitetinin professor-müəllim heyəti və 2019-cu və 2022-ci illərdə Oslo Metropolitan Universitetində təşkil olunmuş yay məktəblərində iştirak edən magistr tələbələri mədəniyyətlərarası ünsiyyətin müxtəlif perspektivlərinə dair təqdimatlarla çıxış ediblər.

Professor Arnfinn Muruvik Vonen layihə və onun nəticələri haqqında geniş məlumat verdikdən sonra tədbir Mikhail Kharakoz`un “Layihə fəaliyyətlərinə tələbələrin reaksiyaları” və Dr. Jørn Holm-Hansenin “Layihənin nəticələrinin qiymətləndirilməsi” mövzusunda təqdimatları ilə davam edib. Tədbirin birinci hissəsi Kristin Bugge`nin “Dayanıqlı akademik tərəfdaşlıqların qurulması” mövzusunda çıxışı ilə yekunlaşıb.

Tədbirin ikinci hissəsi məzun Asiman Qocayev, magistr tələbələri Rahil Dadaşlı, Nigar Abdullayeva, Zaur Məmmədli və Seymur Bayramlının təqdimatları ilə davam edib. Təqdimatlarda “Gənclərin işində mədəniyyətlərarası amillərin rolu”, “Mədəniyyətlərarası ünsiyyətdə maneələr”, “Diplomatik mühitdə mədəniyyətlərarası qarşılıqlı əlaqə”, “Milli mədəniyyətin 6-D modeli”, “Qlobal biznesdə mədəniyyətlərarası kommunikasiya” mövzuları müzakirə olunub. Tədbirin ikinci hissəsi Dr.Maral Camalovanın “Mədəniyyətlərarası ünsiyyətə World Value Survay (WVS) vasitəsilə baxış” mövzusunda çıxışı ilə yekunlaşıb.

Sonda Dr.Ceyhun Məmmədov tədbirdə iştirak etmiş və tədbirin uğurlu keçməsinə dəstək olmuş hər kəsə öz dərin minnətdarlığını bildirib.