2022-ci il noyabrın 17-18-də Xəzər Universitetinin tərəfdaş universitet olduğu və Ud'A Universiteti (Università degli Studi G. d'Annunzio di Chieti-Pescara) tərəfindən koordinasiya edilən “Xəzər regionunun inkişafını dəstəkləmək məqsədilə universitet-sənaye əməkdaşlığını həyata keçirən Təcrübə Müəssisələri pilot kursları”- PICASP (617540-EPP-1-2020-1-IT-EPPKA2-CBHE-JP) adlı layihə çərçivəsində onlayn görüşlər keçirilib.

Noyabrın 17-də keçirilən görüşdə Vilnüs Gediminas Texniki Universitetinin professoru Arturas Kaklauskas, Layihənin koordinatoru, Bolonya Biznes Menecementi Universitetinin professoru Massimo Bianchi, Xəzər Universitetindən isə İqtisadiyyat və menecment fakültəsinin dekanı Ceyhun Məmmədov, Keyfiyyətə Təminat Mərkəzinin direktoru Lyudmila Sotova, İqtisadiyyat və menecment fakultəsinin koordinatoru Bahadır Baysal və İnkişaf ofisinin layihə meneceri Jalə Rzayeva iştirak edib. Görüşdə son zamanlar Xəzər Universitetində daxil olan texnologiyaların və proqram təminatının “MOOC” dərslər (kütləvi şəkildə açıq onlayn dərslər) üçün necə istifadə edilə biləcəyi müzakirə olunub.

Noyabrın 18-də Eramus+ PICASP layihəsi çərçivəsində bütün tərəfdaşlarla daha bir onlayn görüş baş tutub. Görüşdə layihə ilə bağlı hansı işlərin tamamlandığından, hesabatların hazırlanmasından, sənədlərin hansı formada təqdim olunmasından, avadanlıqların alınması tarixlərindən və tərəfdaşların layihə çərçivəsindəki görüşlərdə iştirakından danışılmışdır. Görüşdə Xəzər Universitetini İnkişaf ofisinin direktoru Raziyə İsayeva təmsil edib.