Xəzər Universiteti Nəşriyyatında “Abdulla müəllim xatirələrdə” adlı kitab nəfis şəkildə çap olunmuşdur. Kitaba gəncliyindən ömrünün sonuna qədər Gürcüstanın Qarayazı mahalında, Kosalı orta məktəbində riyaziyyat müəllimi işləmiş və el arasında böyük hörmət qazanmış Abdulla İsayev haqqında onun həmkarları, tələbələri, bölgənin qabaqcıl insanları, eləcə də Kosalı orta məktəbinin məzunları olan bir sıra elm və sənət adamlarının xatirələri daxil edilmişdir.

Kitabın tərtibçisi və “Tərtibçidən” adlı ön sözün müəllifi Xəzər Universitetinin İdarəetmə və tələbə işləri üzrə prorektoru, filologiya elmləri doktoru İsaxan İsaxanlıdır.

Kitab Xəzər Universitetinin təsisçisi, Direktorlar və Qəyyumlar Şurasının sədri, fizika-riyaziyyat elmləri doktoru, professor, akademik (Gürcüstan Mlli Elmlər Akademiyası) Hamlet İsaxanlının “Atam və müəllimim - Abdulla müəllim!” adlı iri həcmli xatirəsi ilə başlanır. Kitabın redaktoru da Hamlet İsaxanlıdır.

“Abdulla müəllimin həyatı və fəaliyyəti şəkillərdə” bölməsində Abdulla İsayevi ailə həyatında, hərbi xidmətdə, həmkarları ilə, qohum-əqrəba və dost-tanışlarla əks etdirən 40-dək foto oxuculara təqdim olunur.

Ümumilikdə 22 nəfərin xatirəsi toplanmış “Abdulla müəllim xatirələrdə” bölməsində onun qayğıkeş ailə başçısı, təcrübəli pedaqoq, xeyirxah, sözübütöv, cəsarətli, dürüst el adamı kimi şəxsiyyəti canlandırılır.

Kitab həm mətn, həm də tərtibat cəhətdən yüksək səviyyədə və zövqlə hazırlanmış gözəl xatirə ədəbiyyatı nümunəsidir.