25 oktyabr – 02 noyabr 2022-ci il tarixlərində Hollandiya Biznes Akademiyasının və Ukraynanın KROK Universitetinin koordinatorluğu ilə “Mediasiya: Təlim və Cəmiyyətin Transformasiyası” layihəsi çərçivəsində MEDİATS Beynəlxalq İdarəetmə görüşü Gürcüstanın İliya Dövlət Universitetində və Batumi Şota Rustaveli Dövlət Universitetində baş tutdu.

Oktyabrın 25-29-da İliya Dövlət Universitetində keçirilən tədbirdə Xəzər Universiteti İqtisadiyyat və menecment fakültəsinin dekanı Dr. Ceyhun Məmmədov, Psixologiya departamentinin koordinatoru, sertifikatlı mediator Mələk Kərimova, İqtisadiyyat və biznesin idarə edilməsi fakültəsinin magistratura pilləsinin müəllimi, mediator Alidə Mahmudova iştirak ediblər.

Görüşdə mediator Alidə Mahmudova Azərbaycanda mediasiyanın inkişafı ilə bağlı təqdimatla çıxış etdikdən sonra Xəzər Universitetinin əməkdaşları Azərbaycan, Gürcüstan, Ukrayna və Avropa İttifaqının nümayəndələri ilə mediasiya üzrə ölkələrindəki vəziyyətlə bağlı panel müzakirələrində iştirak ediblər. Alidə Mahmudova və Mələk Kərimova Azərbaycanda tətbiq olunan mediasiya prosesi ilə bağlı öz peşə təcrübələrini bölüşüb, sualları cavablandırıblar.

Dr. Ceyhun Məmmədov Xəzər Universitetində layihənin icrası ilə əlaqədar mövcud vəziyyətlə bağlı çıxış edib. O, mediasiya üzrə MBA proqramının strukturu, qəbul olunan tələbələrin sayı və kredit tələbləri haqqında iştirakçılara ətraflı məlumat verib. Layihənin davamlılığı məsələsinə toxunan Dr. Məmmədov tərəfdaş universitetlər və Azərbaycanın Mediasiya Şurası ilə əməkdaşlığın genişləndirilməsi istiqamətində aparılan işlərin, Gəncə Dövlət Universiteti ilə mediasiya ilə bağlı davamlı birgə tədbirlərin və seminarların təşkilinin əhəmiyyətini vurğulayıb.

29 oktyabr – 02 noyabr tarixlərində Hollandiya Biznes Akademiyasının və Ukraynanın KROK Universitetinin koordinatorluğunun Batumidə təşkil edilən növbəti İdarə Heyətinin iclasında Xəzər Universitetini Dr. Ceyhun Məmmədov və Mələk Kərimova təmsil etdilər. Bu görüşdə yekun hesabatın elektron formasının, yekun maliyyə hesabatlarının və əlavələrin hazırlanması nəzərdən keçirilmiş və müzakirə edilmişdir.