2022-ci il oktyabrın 16-da Qaradağ rayonunun Lökbatan qəsəbəsində Xəzər Universitetinin magistr tələbəsi olmuş Şəhid Ataməli Musaoğlunun anım mərasimi keçirildi. Öncə Lökbatan Şəhidlər Xiyabanında şəhidin məzarı ziyarət edildi. Xəzər Universitetinin kollektivi adından şəhidin məzarı üstünə əklil qoyuldu. Əklil qoyma mərasimində universitetin rektoru İradə Xəlilova, İctimai əlaqələr və media üzrə direktor Əlövsət Əmirbəyli, Təbiət elmləri və mühəndislik fakültəsinin dekanı Fəxrəndə Əlimərdanova, Təbiət elmləri, sənət və texnologiya yüksək təhsil fakültəsinin dekanı Səidə Şərifova və digər əməkdaşlar iştirak etdilər.
Qaradağ Rayon icra hakimiyyətinin rəhbərliyi və Lökbatan məktəblilərinin iştirakı ilə keçən tədbirdən sonra rayon mərkəzində yerləşən xeyir - şər evində şəhid ruhuna quran oxundu və ehsan verildi.