2022-ci il sentyabrın 22-23-də Xəzər Universitetinin rektoru dosent İradə Xəlilova, Həyat elmləri departamentinin dosenti Cavid Ocaqi və koordinatoru b.ü.f.d. Ayaz Məmmədov İsveçin Uppsala şəhərində yerləşən Kənd Təsərrüfatı Elmləri Universitetində (SLU) təşkil olunmuş “Dayanıqlı İstehsal və İstehlak üçün Xoşbəxt Heyvanlar (HAnimSPAC)” adlı layihənin yekun iclasında iştirak etdilər.

Ukrayna Milli Həyat və Ətraf Mühit Elmləri Universiteti, Poltava Dövlət Aqrar Akademiyası, Litva Səhiyyə Elmləri Universiteti, Estoniya Həyat Elmləri Universiteti və Latviya Həyat Elmləri və Texnologiyaları Universitetlərinin nümayəndələri də SLU-nun Molekulyar Elmlər Departamentində təşkil olunmuş tədbirin iştirakçıları idi.

Xəzər Universiteti Həyat Elmləri departamentinin əməkdaşları tərəfindən fermer və sahibkarlar arasında aparılmış “Heyvanların rifahı” ilə bağlı sorğunun nəticələrinin statistik təhlili tədbir iştirakçılarına təqdim edilərək, geniş müzakirə olundu. Aparılmış sorğunun nəticələrinin təhlilinə əsasən, Azərbaycan və Ukraynada fermerlərin heyvanların rifahı və mühafizəsi haqqında daha çox məlumata ehtiyac duyduğu müəyyən edildi. Eyni zamanda, aparılan müzakirədə layihənin yekunu olaraq, sorğunun nəticələrindən iki məqalə hazırlanaraq beynəlxalq jurnallarda dərc olunması qərara alındı.

Seminarın növbəti günündə tədbir iştirakçıları SLU-nun bir sıra departamentləri ilə və xüsusən Baytarlıq Təbabəti Fakültəsi ilə tanış edildi. Sonra isə heyvanların rifahı ilə bağlı Horizon -2020 və digər beynəlxalq fondlara uzunmüddətli layihənin hazırlanması və təqdim olunması geniş müzakirə olundu.

Səfər müddətində dosent İradə Xəlilova SLU əməkdaşları ilə bir sıra elmi tədqiqat sahələri üzrə əlaqələrin gücləndirilməsinin vacibliyini bildirdi.

Qeyd edək ki, cari layihə 2021-ci ildə İsveç İnstitutu və Baltik Dənizi Regionunda Layihə Təşəbbüsü proqramının maliyyə dəstəyi ilə SLU-nun Molekulyar Elmlər Departamenti, Milli Heyvanların Rifahı Mərkəzi (SCAW), Heyvanların Ətraf Mühiti və Sağlamlığı Departamenti və SLU-nun Qrantlar Ofisi tərəfindən başlamışdır.