2022-ci il oktyabrın 12-13-də Abay Universitetinin heyəti Xəzər Universitetində olub.

Proqramın ilk günündə Abay Universitetinin heyəti Sumqayıt “Dünya” məktəbinə səfər etdi. Məktəbin direktoru Çiçək Qaracayeva, direktor müavini Xuraman Nağızadə və Xəzər Universitetinin Beynəlxalq əlaqələr üzrə prorektoru Vlad Vernygora ilə görüşdə növbəti əməkdaşlıqlar haqqında müzakirələr aparılıb. Heyətin üzvü Jankuşkov Bauyrzhan Orazayeviç 6-cı sinif rus bölməsinin şagirdlərinə “Müəllim peşəsi və peşə seçimində rol oynayan vacib bacarıqlar“ adlı ustad dərsi keçib.

Sonra, proqramın davamı olaraq, Abay Universitetinin heyəti Xəzər Universitetinə gəlib. Görüşdə universitetin rektoru dosent İradə Xəlilova, Tədris işləri üzrə prorektor Məhəmməd Nuriyev, Beynəlxalq əlaqələr üzrə prorektor Vlad Vernygora, Təbiət elmləri və mühəndislik fakültəsinin dekanı Fəxrəndə Əlimərdanova, Beynəlxalq əlaqələr üzrə koordinator Fatimə Vəliyeva, qarşı tərəfdən isə Pedaqogika və Psixologiya İnstitutunun direktoru Abayev Qaliya Əskərbəyovna, “Pedaqogika və psixologiya” Təhsil proqramının baş müəllimi İsaliyeva Saule Temirbaevna, "İbtidai təhsil" tədris kafedrasının baş müəllimi Jankuşkov Bauyrzhan Orazayeviç, “Pedaqogika və psixologiya” elmi-metodiki jurnalının baş redaktor müavini Mombek Aliya Anuarbekovna iştirak etmişlər. Görüşdə ikitərəfli əlaqələrin möhkəmləndirilməsinə dair müqavilə imzalanmış və təhsil müəssisələri arasında tərəfdaşlıq və akademik əlaqələrin gücləndirilməsi istiqamətində müzakirələr aparılmışdır. İmzalanma mərasiminin sonunda tərəflər arasında hədiyyə mübadiləsi olmuşdur. Qonaqlar Xəzər Universitetinin kitabxanası və elektron jurnallar ilə də tanış olmuşlar.

Proqramın ikinci günündə Abay Universitetinin heyəti ilə Bakı “Dünya” məktəbində direktor Nazpəri Bayramova, 5-8-ci siniflərin Tədris işləri üzrə direktor müavini Leyla Cəbrayılova, Təşkilati işlər üzrə direktor müavini Münəvvər Bayramlı və Xəzər Universitetinin Beynəlxalq Əlaqələr üzrə koordinatoru Fatimə Vəliyevanın iştirakı ilə görüş keçirildi.

Məktəbdə yaradılaraq fəaliyyət göstərən Nailəxanım Muzeyində qonaqlara Nailəxanım İsayevanın həyat və fəaliyyətini əks etdirən eksponatlar haqqında ətraflı məlumat verildi və onlara “Nailəxanım Muzeyi” adlı bələdçi kitabça təqdim edildi. “Pedaqogika və psixologiya” Təhsil proqramının baş müəllimi İsaliyeva Saule Temirbaevna muzey və məktəb haqqında təssüratlarını xatirə kitabına yazdı. İsaliyeva Saule və Jankuşkov Bauyrzhan 7-ci sinif rus bölməsinə ustad dərsi keçdilər.

Dünya məktəbinin kitabxanasında rus bölməsinin müəllim heyəti ilə keçirilən görüşdə Pedaqogika və Psixologiya İnstitutunun direktoru Abayev Qaliya Abay Universitetinin cari layihələri və strukturu haqqında məlumat verdi.

Qeyd edək ki, Abay Universiteti Qazaxıstanın ən böyük və aparıcı universitetlərindən biridir.