2022-ci il oktyabrın 12-də Radio-Televiziya Yayımı və Peyk Rabitəsi İstehsalat Birliyi (Teleradio İB) ilə Xəzər Universiteti arasında anlaşma memorandumu imzalanıb. Tədbirdə Xəzər Universitetinin rektoru dosent İradə Xəlilova, Təbiət elmləri və mühəndislik fakültəsinin dekanı Fəxrəndə Əlimərdanova, Fizika və elektronika departamentinin müdiri Fəridə Tatardar, Teleradio İB-nin baş direktoru Mikayıl Abbasov, baş direktorun müavini Rəşad Əliyev, şöbə müdirləri Şamxal Rüstəmov və Orxan Kərimov iştirak etmişlər.

Memorandumda universitetin tələbələrinin Teleradio İB-nin bazasında istehsalat təlimi və təcrübə keçmələrinə şərait yaradılması, eləcə də radiotexnika və elektronika sahələrində istehsalatla bağlı texnoloji proseslərin təkmilləşdirilməsi, elmi tədqiqat işlərinin aparılması istiqamətində birgə fəaliyyətin göstərilməsi nəzərdə tutulur. Sənəd, həmçinin, tələbələrin texniki ixtisaslara yiyələnməyə həvəsləndirilməsi üçün birgə innovativ yeniliklərə əsaslanan proqramların hazırlanması və digər istiqamətlərdə əməkdaşlıq məsələlərini əhatə edir.

Memorandumda qeyd olunan proseslərin ən qısa zamanda həyata keçirilməsi üçün hər iki tərəfin müvafiq struktur bölmələri arasında, eləcə də tələbələrlə davamlı görüşlərin keçirilməsinin vacibliyi vurğulanıb və əməkdaşlığın faydalı olacağına əminlik bildirilib.