2022-ci il oktyabrın 7-də Xəzər Universitetinin İqtisadiyyat və menecment departamentinin doktorantı –Azərbaycan və İordaniya arasında mədəniyyət mübadiləsi protokolu çərçivəsində 2018-ci ildən Xəzər Universitetində 5310.01 - “Dünya iqtisadiyyatı” üzrə doktorantura təhsili alan Mustafa Alalawneh`in dissertasiya işinin ilkin müzakirəsi keçirilmişdir.

İqtisadiyyat və menecment departamentinin koordinatoru i.ü.f.d. Maral Camalova doktorantın təhsili, elmi fəaliyyəti və ilkin müzakirə üçün zəruri olan sənədlərlə bağlı məlumat verdi. Doktorant iclas iştirakçılarını dissertasiya işinin əsas müddəaları – dissertasiyanın strukturu, məqsəd və vəzifələri, mövzunun aktuallığı, mövzunun ədəbiyyata gətirdiyi elmi yeniliyi və qısa məzmunu ilə tanış etdi.

Sonra komissiya üzvlərinin – Xəzər Universitetinin İqtisadiyyat və menecment fakültəsinin dekanı, i.ü.f.d. Ceyhun Məmmədov, Xəzər Universitetinin İqtisadiyyat və biznes yüksək təhsil fakültəsinin dekanı, i.ü.e.d. İnqilab Əhmədov, Xəzər Universiteti İqtisadiyyat və menecment departamentinin müəllimi dosent Fuat Rəsulov və Azərbaycan Dövlət İqtisad Universitetinin İqtisadiyyat kafedrasının dosent Azər Mehdiyevin rəy və təklifləri dinlənildi, doktorant mövzu ilə bağlı sualları cavablandırdı.

Komissiya üzvləri ilə yanaşı doktorantın elmi rəhbəri i.e.d. professor Müslüm İbrahimov da iclasda çıxış etmişdir. Çıxış edənlər mövzunun aktuallığı, birbaşa xarici investisiyaların iqitisadi inkişafda rolu, statistik/ekonometrik hesablamalarla bağlı münasibətlərini bildirdilər.

Müzakirənin sonunda Mustafa Alalawneh`in “Birbaşa xarici investisiyaların İordaniyanın iqtisadi inkişafına təsirinin qiymətləndirilməsi” adlı elmi tədqiqat işinin Azərbaycan Respublikası Prezidentinin yanında Ali Attestasiya Komissiyasının tələblərinə cavab verdiyi nəzərə alınaraq, iqtisadiyyat üzrə fəlsəfə doktoru elmi dərəcəsi almaq üçün növbəti mərhələyə keçirilməsinə qərar verildi.