Xəzər Universitetinin Kitabxana - İnformasiya Mərkəzi Mədəniyyət Nazirliyinin təşkilatçılığı ilə keçirilən VIII Bakı Beynəlxalq Kitab Sərgisində iştirak edir.

Oktyabrın 5-də Bakı Ekspo Mərkəzində açılışı olan sərgidə 10-dan çox ölkədən 60-dan artıq xarici təşkilat,118 yerli nəşriyyat-poliqrafiya və kitab sənəti ilə əlaqəli müəssisə təmsil olunur. Açılış mərasimində Baş nazirin müavini Əli Əhmədov, mədəniyyət naziri Anar Kərimov, Türkiyənin mədəniyyət və turizm nazirinin müavini Serdar Çam və Azərbaycan Yazıçılar Birliyinin sədri, Xalq yazıçısı Anar çıxış edərək, sərginin əhəmiyyətindən danışıblar.

Ali məktəblər arasında Xəzər Universitetinin stendi də yer alır. Xəzər Universitetinin stendində, əsasən, universitetin nəşri olan dərslik və dərs vəsaitləri, elmi jurnallar, konfrans materialları nümayiş olunur. Sərgidə Xəzər Universitetinin loqosu olan məhsullar - bloknot, qələm, çanta, köynək və qovluq iştirakçılara hədiyyə edilir.

VIII Bakı Beynəlxalq Kitab Sərgisi oktyabrın 10-na qədər davam edəcək.