Xəxər Universitetinin Tədris işləri üzrə prorektoru, professor Məhəmməd Nuriyev, İqtisadiyyat və Menecment fakültəsinin dekanı Dr. Ceyhun Məmmədov, Azərbaycan Dövlət Neft və Sənaye Universitetinin doktorantı Əziz Nuriyev və Xəzər Universitetinin İqtisadiyyat və menecment departamentinin doktorantı Coşqun Məmmədovun “Müxtəlif şəraitə malik iqtisadi regionlar üçün bərpa olunan enerji mənbələrinin seçilməsi: Azərbaycan nümunəsi” adlı elmi məqaləsi Multidisciplinary Digital Publishing Institute (MDPI) nəşriyyatının nüfuzlu ”Sustainability” jurnalında dərc olunub. Jurnal SCIE and SSCI (Web of Science), həmçinin Scopus-da müvafiq olaraq 3.889 impakt faktoru və 5.0 CiteScore ilə indekslənir.
Məqalədə Azərbaycanın müxtəlif şəraitə malik regionları üçün bərpa olunan enerji mənbələrinin seçilməsinin xüsusiyyətləri öyrənilir. Məlumat regionların şəraitinin təhlili və ekspertlərin rəyləri əsasında əldə edilir. Təhlillər göstərir ki, ölkənin iqtisadi rayonlarının coğrafi mövqeyi, təbii sərvətlərinin müxtəlifliyi və bir sıra digər amillər bərpa olunan enerji mənbələrinin seçilməsində bu regionların bölünməsini tələb edir. Yenilənə bilən enerji mənbələrinin seçilməsinin yüksək qeyri-müəyyənlik şəraitində çox meyarlı qərar qəbul etmə (MCDM) işi olduğunu nəzərə alaraq, Z rəqəminə əsaslanan modellər hazırlanmış və İdeal həllin oxşarlığı ilə üstünlük sırasının təyin edilməsi metodunun Z-genişlənməsi (TOPSIS) üsulundan istifadə edilmişdir. Məqalədə Qarabağ və Quba -Xaçmaz iqtisadi rayonları üzrə əldə edilmiş nəticələr təqdim olunur.
Nəticələr göstərir ki, bərpa olunan enerji mənbələrinin qeyri-bərabər paylanması və qərarların qəbul edilməsinə təsir edən amillərdə əhəmiyyətli fərqlər olduğu halda, iqtisadi rayonları bölmək və bərpa olunan enerji mənbələrinin seçilməsi üçün müxtəlif modellərdən istifadə etmək lazımdır.
Məqalənin tam mətni aşağıdakı linkdə:
Copyright © Xəzər Universiteti, 2025
