2022-ci il sentyabrın 15-də Qafqaz İslam Ordusu tərəfindən Bakının daşnak-bolşevik işğalından azad edilməsinin 104-cü ildönümü münasibətilə Türkiyənin Azərbaycandakı səfirliyində tədbir keçirilib.

Tədbir iştirakçıları əvvəlcə Bakının Qafqaz İslam Ordusu tərəfindən işğaldan azad olunmasını əks etdirən rəsm sərgisi ilə tanış olublar.

Sonra Azərbaycan və Türkiyə şəhidlərinin xatirəsi bir dəqiqəlik sükutla yad edilib, iki ölkənin Dövlət himnləri səsləndirilib.

Tədbirdə Türkiyənin Azərbaycandakı səfiri Cahit Bağçı, Beynəlxalq Türk Mədəniyyəti və İrsi Fondunun prezidenti Günay Əfəndiyeva, TÜRKPA-nın Baş katibi Mehmet Süreyya Er, Milli Məclisin deputatları Anar İskəndərov, Aydın Mirzəzadə, Hikmət Babaoğlu və Ramil Həsən çıxış edərək, 15 sentyabr hadisələrinin əhəmiyyətindən söz açmış, Türkiyə-Azərbaycan qardaşlığından danışmışlar.

Xəzər Universitetinin Tarix və arxeologiya departamentinin müdiri dosent Telman Nüsrətoğlu Azərbaycan-Türkiyə əlaqələrinin tarixi haqqında sənədləri təqdim edib, Cənubi Qafqazda ermənilərin yerləşdirilməsi haqqında danışıb və Osmanlı-Azərbaycan münasibətlərinə nəzər salıb.

Tədbir “Qurani-Kərim”in tilavəti və şəhidlərin ruhuna duaların oxunması ilə başa çatıb.

AZƏRTAC tədbir haqqında fotolarla müşayiət olunan geniş xəbər yayımlayıb:

https://azertag.az/xeber/Turkiyenin_olkemizdeki_sefirliyinde_Bakinin_dasnak_bolsevik_isgalindan_
azad_edilmesinin_104_cu_ildonumu_qeyd_olunub-2293049