Azərbaycan Turizm və Menecment Universiteti
Xəzər Universitetinin Direktorlar və Qəyyumlar Şurasının sədri
cənab Hamlet İsaxanlıya
Hörmətli Hamlet müəllim,
İlk öncə bir kitabsevər kimi məmləkətimiz olan Odlar Yurdunun öz zəngin mədəni irsi, möhtəşəm tarixi, dəyərli ictimai xadimləri və sənətkarları ilə tanınan gözəl Qarabağımıza həsr etdiyiniz bu önəmli və kifayət qədər maraqlı məlumatları özündə əks etdirən əsərə görə Sizə minnətdarlığımı bildirirəm.
Xüsusilə 44 günlük Qarabağ Zəfərimizdən sonra vətənimizin ayrılmaz parçası, elm, təhsil, mədəniyyət və musiqi mərkəzi olan dillər əzbəri Qarabağımız haqqında maraqlı kitab olması məni bir azərbaycanlı olaraq həm kövrəltdi, həm də sevindirdi.
Hesab edirəm ki, Qafqazın önəmli mərkəzlərindən olan Qarabağımızın tarixinə müxtəlif istiqamətləri bir arada tutaraq əsl ziyalı yanaşması göstərməyiniz oxuyucular üçün də əsas maraq doğuran cəhətlərdən biri olacaqdır.
Əminliklə deyə bilərəm ki, “Mənim Qarabağım və ya Qarabağ düyünü" adlı qələmə aldığınız bu kitab universitetimizin kitabxanasında xüsusi yer tutacaq, xüsusilə gənclərimiz üçün Qarabağın tarixinə qısa nəzər salan, mərhələli formada Qarabağ probleminin yaranmasını özündə əks etdirən, xüsusilə müasir dövrdə problemin həllinə dair beynəlxalq aləmin yanaşmasına ətraflı işıq salan məlumat mənbəyi kimi mühüm rol oynayacaqdır.
Bu günədək adıkeçən mövzu haqqında çox kitablar yazılıb, yazılır və yazılacaqdır. Bizləri oxucu olaraq maraqlandıran ən önəmli cəhət məlum məsələyə Sizin kimi dürüst müəllif və ziyalı baxışı ilə yanaşılmasıdır.
Sizə bundan sonrakı elmi yaradılıcığınızda bol-bol uğurlar diləyir, nailiyyətlər arzulayıram.
Hörmətlə,
Rektor İlham Mədətov
07 sentyabr 2022-ci il