2022-ci il sentyabrın 1-də Xəzər Universitetinin Həyat elmləri departamentinin əməkdaşları ilə Türkiyənin Qars şəhərində yerləşən Qafqaz Universitetinin Baytarlıq fakültəsinin əməkdaşları arasında onlayn görüş keçirildi. Görüşdə Xəzər Universitetinin rektoru dosent İradə Xəlilova, Təbiət elmləri, sənət və texnologiya yüksək təhsil fakültəsinin dekanı dosent Səidə Şərifova, dekan müavini dosent Məhəmməd Eldarov, Həyat elmləri departamentinin müdiri b.ü.f.d. Səltənət Ağayeva, baytarlıq təbabəti üzrə koordinator b.ü.f.d. Ayaz Məmmədov, departamentin dosenti Cavid Ocaqi, Qafqaz Universitetinin prorektoru Prof. Engin Kılıç, Baytarlıq fakültəsinin dekanı Prof Dr. Mete Cihan, dekan müavini prof.Dr. Cihan Kaçar və beynəlxalq əlaqələr üzrə koordinatoru Prof. Dr. Hacıali Necefoğlu iştirak etdilər.

Rektor İradə Xəlilova çıxışında hər iki universitet arasında baytarlıq təbabəti istiqamətində birgə tədqiqatların aparılması, layihələrin icrası və digər məsələr üzrə əməkdaşlığın qurulmasının əhəmiyyətini və bunun üçün ilk növbədə birgə əməkdaşlıq üzrə memorandumun imzalanmasının vacibliyini qeyd etdi.

Ayaz Məmmədov baytarlıq təbabəti üzrə təhsilin keyfiyyətinin daha da artırılması məqsədilə Xəzər Universitetinin nəzdində baytarlıq klinikasının qurulmasının vacibliyini qeyd edərək, bu istiqamətdə Qafqaz Universitetinin təcrübəsinə ehtiyac olduğunu da vurğuladı.

Qafqaz Universitetinin alimləri də qarşılıqlı əməkdaşlığı yüksək qiymətləndirərək, Xəzər Universitetində heyvan xəstəxanasının qurulmasında dəstək göstərəcəklərini bildirdilər.

Aparılan müzakirədə Qafqaz Universitetinin müəllimləri tərəfindən Xəzər Universitetinin baytarlıq təbabəti üzrə təhsil alan tələbələrinə dərslərin keçirilməsi, yüksək nəticə göstərən tələbələrin müəyyən müddətdə Qafqaz Universitetində ikili diplom əsasında təhsil almaları, təcrübə keçmələri, birgə tədqiqatların aparılması, layihələrin həyata keçirilməsi və s. məsələlərə dair ilkin razılığa gəlindi.