“2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə xaricdə doktorantura təhsili” proqramı çərçivəsində Azərbaycan Respublikasının Təhsil Nazirliyi və Xəzər Universiteti ilə üçtərəfli müqavilə əsasında yüksək reytinqli xarici universitetlərdə təhsil alan doktorantların seminarları təşkil edildi.

2022-ci il iyunun 22-də Təbiət elmləri, sənət və texnologiya yüksək təhsil fakültəsinin və Həyat elmləri departamentinin təşkilatçılığı ilə London Kollec Universitetində təhsil alan doktorant Mədinə Quliyevanın “Nanohissəcik-hüceyrə qarşılıqlı əlaqələri: nanohissəcik qəbulunda zülal tacının vacib rolu”, iyunun 28-də Birləşmiş Krallığın Exxes Universitetində təhsil alan doktorant Aygün Azadovanın “Alternative splaysinq analizi, yeni protein izoformları” mövzularında seminarları keçirildi.

Onlayn təşkil olunan seminarlarda həm Xəzər Universitetinin, həm də digər universitetlərin tələbə və əməkdaşları iştirak etdilər. Məruzələrdən sonra suallar cavablandırıdı və geniş müzakirələr aparıldı.